Karja par Tuhan bae-bae
4:1-8
4
1 Timotius e! Beta mau janji ale deng sunggu-sunggu di muka Allah deng Yesus Kristus yang nanti bale kombali ka dunya par jadi hakim par orang-orang yang hidop deng yang mati, deng yang nanti pegang parenta jadi Raja par samua orang di dunya ni. 2 Ale musti kasi tau Allah pung Kabar Bae tarus. Ale musti siap tarus par kasi tau akang, seng usa pikir orang mau dengar ka seng. Kalo ada yang biking ka parcaya apapa yang sala, ale musti kasi unju dong pung sala tu biar dong tau akang. Tagor dong jang biking bagitu deng kasi nasehat dong biar dong biking apa yang bae tarus. Ale musti kasi balajar dong bae-bae deng musti sabar waktu biking samua tu. 3 Barang, satu waktu nanti ada orang-orang yang seng mau tarima Allah pung ajarang yang batul lai. Mala dong cuma mau iko dong pung mau sandiri, jadi dong cari guru banya-banya par kasi balajar apa yang sadap di dong pung talingang sa. 4 Dong nanti tutu dong pung talingang dari ajarang yang batul soal Yesus Kristus. Dong cuma mau dengar carita-carita dolo-dolo.* 5 Mar ale Timotius, ale musti jaga ale pung diri tarus. Ale musti tahang hati deng parcaya Yesus tarus waktu susa deng sangsara. Kasi tau Allah pung Kabar Bae par orang-orang yang balong parna dengar akang deng biking ale pung tugas yang Antua su kasi par ale.6 Timotius e, beta bilang macang bagini par ale tagal beta pung hidop deng karja par Allah su mau abis. Beta su kasi beta pung hidop samua par jadi korbang par Allah.a 7 Beta su karja iko beta pung kuat par biking samua yang bae yang Tuhan suru sampe akang abis. Beta macang deng tantara yang pake dia pung kuat samua par baku prang sampe manang, ka macang deng orang yang iko lomba lari sampe di akang pung garis finis. Beta su iko Yesus Kristus pung ajarang yang batul tarus. 8 La sama deng hadia yang orang kasi siap par orang yang manang lomba, sakarang ni Tuhan su kasi siap hadia par beta di sorga tagal beta hidop iko Antua pung mau. Antua tu Hakim yang seng barát sabala. Antua nanti kasi hadia tu waktu Antua datang par putus manusia di dunya ni pung parkara. Antua kasi hadia tu bukang cuma par beta sa, mar par samua orang yang rindu Antua datang kombali ka dunya ni.
Paulus pung pasáng-pasáng yang laste par Timotius
4:9-18
9 Timotius e, tolong usaha datang capat-capat kamari, 10 tagal Kreskes su pi ka propinsi Galatia, bagitu lai deng Titus yang su pi ka propinsi Dalmatia. Mar Demas, tagal dia labe suka hal-hal di dunya yang biking dia sanang, jadi dia su kasi tinggal beta la pi ka kota Tesalonika. 11 Cuma Lukas sa yang ada sama-sama deng beta. Tolong pi ambe Markus la datang sama-sama deng dia kamari jua, tagal dia bisa bantu beta pung karja di sini. 12 Beta su suru Tikikus pi ka kota Efesus. 13 Kalo ale datang, tolong bawa beta pung baju panas yang beta kasi tinggal di Karpus pung ruma di kota Troas. Tolong bawa beta pung buku-buku lai jua. Yang paleng panting tu buku-buku dari kambing pung kuli.b
14 Aleksander, tukang tambaga tu, su banya kali biking hal yang jahat par beta. Tuhan nanti balas apa yang dia su biking par beta. 15 Ale musti taru kira dia bae-bae, tagal dia paleng malawang katong pung ajarang.
16 Timotius, waktu beta partama kali bela beta pung diri di muka orang Roma pung hakim, seng ada satu orang lai yang tolong beta. Dong samua bale balakang dari beta. Beta minta biar Allah kasi ampong dong yang su biking bagitu. 17 Mar waktu itu, Tuhan ada deng beta tarus. Antua kasi kuat beta sampe beta bisa kasi tau Kabar Bae samua biar samua orang yang bukang Yahudi dengar akang. Antua jua kasi salamat beta dari orang-orang yang mau bunu beta. 18 Memang Tuhan pasti jaga beta dari samua orang yang mau biking jahat par beta. Antua nanti bawa beta deng salamat sampe di sorga, di Antua pung tampa pegang parenta. Mari katong samua puji-puji Antua tarus-tarus. Amin.
Paulus tutu dia pung surat
4:19-22
19 Timotius, tolong kiring beta pung hormat jua par Priskila deng Akwila, deng par Onesiforus pung kaluarga lai.* 20 Beta su kasi tinggal Erastus di kota Korintus. Beta jua su kasi tinggal Trofimus di kota Miletus tagal dia saki. 21 Usaha datang capat-capat kamari, jang sampe musing ujang baku dapa ale.
Ebulus, Pudes, Linus, Klaudia, deng basudara samua yang iko Yesus di sini kiring hormat par ale.
22 Beta minta biar Tuhan ada tarus-tarus deng ale deng biar Antua kasi berkat basar par kamong samua.
Hormat, Paulus