29
Xaa nanzhont diizh gorna ngalno xaa xaa,zhega ta lux xaa.
2 Gorna nzhak zyen xaa nali, lee re xaa yezh nyakla;
gorna lee xaa nakap nabeyy, lee re xaa yezh nded bid.
3 Xaa nkela yalnzhak nle nix xaa lextoo xuz xaa;
lee xaa nya lo ngwnaa, me nto cho, sbaasa nlux xaa xtemi xuz xaa.
4 Kwaan yalnali nabeyy rey yezh;
lee xaa nebse naab kix xaa lo zee nluux yezh.
5 Lee xaa nkade wechxinn kwaan wdizh nadoo,
nzob xaa tramp lo xaa.
6 Lee xtramp re xaa nakap nak leeka kwaan nle xaa,
per lee xaa nali nzholl kwaan yalnix.
7 Lee xaa nali nzhekla lee yud re xaa nales nzhak,
per lee xaa nakap nixa nanlet xaa kas.
8 Re xaa nxizhno nle xaa, zee nkee re xaa yezh bi;
per lee xaa nzhak nle zheta nzhak re xaa yezh.
9 Gorna lee xaa nzho yek ndildiizh kwaan xaa ned,
nexa chol xizh xaa o chol yii xaa, nik tub kwaan nayaant xaa.
10 Re xaa nzhut myet nayii xaa ne xaa re xaa nali,
per lee re xaa nali nkwaan xaa lake wen kwaan lee xaa.
11 Lee xaa nachan nansekwast yalnayii cheen,
per le xaa nzhak nzho mod nle xaa gan loya.
12 Chelee tub xaa nabeyy reke tich yalkade,
rese xaa xaa nagakt nali.
13 Xaa prob nu xaa ntezi xaa nkano xaa tub kwaan lal:
Xaa Tubka Nak nle zee nyani garlo ropse xaa.
14 Lee rey, xaa naab kwent lo xaa prob tub mod nali,
nabeyy xaa tira.
15 Galno/Seli xaa xinn xaa kwaan bar zee gak mad xaa nzhak,
per chelee xaa nangalnot xaa xinn xaa zee gak mad yalnto cheen xnaa mad.
16 Gorna nabeyy re xaa nakap, nzhak zyen jwalt;
per lee re xaa nali wii gorna lux re xaa ba.
17 Bseli xgann lu zee zheta gak lu,
nu gak nix lextoo lu.
18 Gorna nzho jwalt xaa nzaa kwent kwaan nzhé Dios, lee yezh nanet cho kwaan le,
per wen doo re xaa ngozhaw ley.
19 Nanebt kwaan wdizh nseli xaa xmos xaa;
nixa nlaya yek xaa per nanlet xaa kas.
20 Wii lo re xaa nanlet xgab kwaan nii.
Mas wen kwaz xaa lo xaa ned ke lo xaa ba.
21 Xaa nzaa rese kwaan lo xmos axta leezha chuut xaa,
gwluzh rese xcheen xaa gak cheen xaa nke zhiin.
22 Lee xaa nayii nkwaan dil;
lee xaa naxinn tubka nle jwalt.
23 Lee xaa gaya doo nzhak gak nadoo,
per lee xaa nadoo gak non.
24 Xaa nle yud xaa nlewann nle nawent xaa lo leeka lee xaa,
nixa nzhon xaa xobde xaa xaa per nangot xaa roo xaa.
25 Nzheb xaa ne xaa samyet xaa nak mod tub tramp,
per lee xaa ngwii lo Xaa Tubka Nak nik tub kwaan nagakt lo xaa.
26 Zyen xaa naab yud lo xaa non,
per nebse Xaa Tubka Nak nle kwaan nali .
27 Re xaa nali nanyulat xaa re xaa nakap,
nu lee re xaa nakap nanyulat re xaa nali.