Wdizh cheen Agur
30
Wdizh cheen Agur xgann Jaqué. Kwaan ngunii xaa lo Itiel nu nguniiya lo Ucal."Nguzha doo na Dios;
nguzha doo na nu ngu guzh doo na.
2 Na nak tub xaa masra ned lo rese xaa;
nankanot na xgab cheen myet.
3 Namseedt na nu nixa nankanot na yalnzhak,
nixa nanlabeyyt na yalnzhak cheen Dios xaa nzhul.
4 ¿Cho ngwa yiba nu nyaad lo yizhyo?
¿Cho nzho mod zen mbi kwaan lozhya o toop nistoo kwaan xab?
¿Cho mdexkwaa axta paro ne yizhyo?
¿Cho nlabeyy le xaa o le xgann xaa?
5 Rese xtizh Dios nak kwaan nambeyy;
lee xaa nak mod yiib kwaan nsaaw re xaa kwaan ngwii lo xaa.
6 Nazhiibtra lu mas diizh lo xtizh xaa zee nagalnot xaa lu,
nu napa zee wii xaa lo lu tub xaa nkade.
7 Nzho chop kwaan naab na lo lu, Dios;
zaaya lo na gorna zeraka yet na:
8 Bachi re kwaan nanont nu re yalkade lo na,
nixa nalet lu gak rik na nu nixa nalet lu gak prob na,
nebse zaa kwaan gaw na yizata mbizh.
9 Nel cheleeya kano doo na kwaan zee nap kale na xgab: ¿Cho nak Xaa Tubka Nak?
Nu chelee na prob na, zee napa kalewann na,
zee koo na xkalnto, Xtios na.
10 Naniinawent lu nak mos delant lo xaa nke xaa zhiin lo,
nzho mod xobde xaa lu nu ded lu bid.
11 Nzho xaa nxobde lo xuzh xaa
nu nii nawent xaa xnaa xaa.
12 Nzho xaa nzak nzhul doo nak xaa,
nu seetaka beed xaa lo re kwaan nawent.
13 Nzho xaa nzak non doo,
nu ngwii xaa lo re xaa mod xaa nanont.
14 Nzho xaa, leyy xaa nak spad nu leyy xaa ke yech nak kuchi;
zee teed xaa bid re xaa prob lo yizhyo nu re xaa nadoo nak.
15 Lee sanguijuelaa nkano chop xchaap
kwaan nebse mbezh: "Zaaya, zaaya".
Nzho chon kwaan nak kwent ma ne, kwaan tira nanyizhat,
nu lee dapa nambezht: "Nanzheklatra na".
16 Baa, me nit,
yizhyo kwaan tubka nge nis lo,
nu bal kwaan tubka nzek.
17 Xaa kwaan ngwii nawent lo xuz,
nu ngwii nawent xtizh xnaa xaa,
lee nga koo zaalo xaa zee,
nu lee xinn msi keba.
18 Chon kwaan nzholaan lo na,
nu lee kwaan dap nalabeyytaka na.
19 Naz cheen msi naz yiba.
naz cheen mball cho ke,
naz cheen bark leen nistoo,
nu naz cheen xaabyi lo ngwnaa.
20 Snee nle ngwnaa, me nto cho:
nzhaw me, nchee me roo me
nu mbezh me: "Nik tub kwaan nawent namlet na".
21 Nzho chon lo myet kwaan nle nxiz yizhyo,
nu axta dap kwan nle zee nkwiiba:
22 Xaa kwaan nke zhiin zhin nzhak rey,
xaa ned nu kano doo kwaan gaw,
23 ngwnaa, me nakelat xaa nu nchelya,
nu me nke zhiin,nzhin nzha me nlake re kwaan lo.
24 Nzho tap ma chuut lo yizhyo
nu nak ma kwaan mas nzhak lo re xaa yalnzhak:
25 Re mri, ma nankanot gro jwers,
bayey ntoop ma kwaan nzhaw ma dubse kwares;
26 re konej, ma nangezht,
per ndexkwaa ma li ma leen ke;
27 re mbeso, ma nankanot cho nabeyy lo,
nu tubka nroo re ma mod xaa ndil;
28 Re xambiil, ma nzen xaa kwaan yaa xaa,
per axta garli rey nzho ma.
29 Chon kwaan chul doo nzhak nze,
nu lee dapa xwa nze:
30 Mbezh, ma ngezhra lo rese ma,
nu nik tub ma nanzhebt ma ne ma;
31 Gaay ma xwa doo nu chib mach
nu rey, xaa kwaan nik tub xaa nayet lo.
32 Chelee lu le lu mod tub xaa naxen nu nzak lu xwa lu,
nu le lu xgab le lu kwaan nawent,
¡bzob le xgab!
33 Wlipa lee xaa nzhi xaa nizh, zee ndroo mantequilla,
nu lee xaa nye nsii xaa xii xaa, zee nroo ren,
nu lee xaa nle nrixyan xaa nle zee nyu dil.