27
Natot lu yalxwa lo re kwaan le lu mbizh yee,nel nanet lu cho kwaan gak yee.
2 Natot lu yalxwa leeka cheen lu;
laa stub naz xaa nii xwa lu.
3 Nga ke, nga yux,
per kwaan masra nga nak yalnayii cheen xaa ned
4 Nakap nak xyan nu lee yalnayii nak kwaan nluux,
per nyent cho nzho mod le gan lo yalmbidyos.
5 Wenra galno xaa xaa tub mod kwaan nlu lo xaa,
ke kela xaa xaa xlaan.
6 Mas wenra xmig xaa xaa nseweey xaa,
ke xaa nayii ne xaa nu nzhaw xaa bit ta garlo xaa.
7 Xaa nanlaant, nixa mzhin nanzheklat xaa;
lee xaa nlaan, axta kwaan nala nzak xaa nax.
8 Mod mbyin, ma nkanze zit lo xlaaz,
nak xaa zit nzo garli.
9 Lee nseyt nu lee perfum nle nix lextoo xaa;
nu lee konsej wen cheen xaa nyen xaa, nle zee wlipa nzhak wen lextoo xaa.
10 Nalaat lu xmig lu nixa nalaat lu xmig xuz lu.
Nayat lu garli wech lu gorna nded lu yalzi.
Nonra xaa nzho gax garli lu ke wech lu, xaa nzo zit lo lu.
11 Xgaan, gok xaa nzhak zee le nix lu lextoo na;
snee zee nzho mod keb na lo re xaa nii nawent na.
12 Lee xaa nzhak ngwii lo kwaan nakap nu mbachi xaa;
per lee xaa nachan nded nu nyizo re yalzi.
13 Nzhaal kiib xaa xab xaa zaa diizh kix dinn cheen stub xaa nanlabeyyt xaa;
nu nzhaal zen xaa xcheen xaa kwaan nzaa dinn lo ngwnaa, me nto cho.
14 Xaa garziil doo nye nii wen lo xmig,
nak mod nii nawent xaa lo xmig xaa.
15 Mod pa tubka nzhunn gorna nla yey
nak ngwnaa me tubka ndil.
16 Xaa nzhekla le zheta me nak mod xaa nzhekla sekwaaz mbi o mod xaa nzhekla zen nseyt kwaan yaa xaa.
17 Kwaan lim ngoo xaa lo yiib,
snee lee myet nzhak wenra kwent cheen xmig xaa.
18 Xaa nkanap yag ig zhaw xaa ig cheena,
nu lee xaa wen nle lo xaa nke xaa zhiin lo kayaa xaa kwaan wen.
19 Lo nis nlu garlo xaa,
nu lee xomod nak myet nlu lo lextoo xaa.
20 Lee baa, lee yalgut nu lee yalnzoblazh cheen myet
tira nanyilot nkwaaz.
21 Leen gor bal nle xaa preb plat,
nu leen gor bal nle xaa preb or;
lee myet nzhakbeyy kwent cheen kwaan nii xaa xaa.
22 Nixa le bdich lu nu zoog lu xaa ned,
nu kich lu xaa mod nzhobxtil,
per nyent mod kiib lu yalned lo xaa.
23 Wii wen xomod nak re xma lu;
kanap wen re xchib lu nu re xpakxiil lu;
24 nel lee re kwaan wen nandiit tira
nixa re kwaan non nanakt tubka.
25 Gorna lob xaa lo yo nu len yix naye,
nu toop xaa yix re yi,
26 zee lee mbakxiil zaa kwaan gak lu,
nu lee chib zaa kwaan zee zi lu tub lee lo yo;
27 kano lu kwal nizh cheen chib
zee go lu nu re xaa li lu,
nu rese me nke zhin lo lu.