Yalned
26
Nanlat yeg tyemp kwaan nla neey,nixa nanlat yey gorna ntoop xaa yalgon,
nu snee nanlet xaa respet xaa ned.
2 Mod chit, ma nkenla, nu mod korluunch ma nzebi,
snee nazhint kwaan xobde xaa lo xaa cheleeya namlet xaaya.
3 Lee kabay nseed xaa kwaan tapoj,
nu lee ngwes ngo xaa doo roo,
nu lee tich xaa ned nla xaa bar.
4 Nakebt lu lo xaa ned kwaan yalned cheen xaa,
napa noka lu kayak ned mod lee xaa.
5 Keb lo xaa ned mod nzhal yalned cheen xaa,
zee nalet xaa xgab lee xaa nkano yalnzhak.
6 Mod roog nii xaa, o mod go xaa tub kwaan nawent,
sbaa nak xaal xaa tub xaa ned le yabis.
7 Mod kor mdeen kwaan nkenga nu nyent mod le xaa kwaan,
sbaa nanont nak yalnzhak kwaan nii xaa ned.
8 Mod kadoo xaa tub ke lo kemandal,
sbaa nak le xaa respet xaa ned.
9 Mod yich kwaan nyaaz yaa nguy,
sbaa nak yalnzhak kwaan nii xaa ned.
10 Mod tub xaa nkee wez, xaa nseweey re xaa,
sbaa nak xaa nree xaa ned o xaa nanlabeyyt.
11 Mod mbak, ma mbare nzhaw kwaan mbare lextoo,
sbaa mbare xaa ned lo yalned cheen xaa.
12 Mas wen gak xaa tub xaa ned,
ke gak xaa tub xaa nzak nzhak doo.
13 Lee xaa nchaab nii:
"Naroot na nel nzonlaa tub mbezh!
¡Tub mbezh nkanze leen naz!"
14 Lee blii cheen yoo nebse nyek lo bisagr,
sbaa nyek xaa nchaab lo xloon xaa.
15 Lee xaa nchaab ncheep yaa leen yann,
nu axta nchaab xaa lep xaa kwaan gaw xaa.
16 Lee xaa nchaab mbezh:
"Nzhakra na ke lo tub gazh xaa nzho mod zaa konsej".
17 Mod zen xaa nzha tub mbak, ma nzhaded,
sbaa nak xaa ncheep yek pa kadil xaa.
18 Mod xaa nzhak naxen, xaa nkee wez,
kwaan nzob ki yek nu kwaan nle yet xaa,
19 sbaa nak xaa nkade xmig,
nu zeera mbezh xaa: "Sbaasa ngunii naya".
20 Chelee yag nyentra lo ki nazaatraya bal,
chelee xaa nakwaantra xaa diizh nayotra dil.
21 Lee blan nlexchinn nzaa ki, lee yag nlexchinn nzaa bal
lee xaa nxizhno myet nle xchinn nebse nkwaan dil.
22 Re diizhyix nak mod tub kwaan nax doo;
nu nlaya axta pa mas nech leen lextoo xaa.
23 Mod teeb xaa plat cho yas yo,
sbaa nak luzh xaa nakap, xaa nii wdizh naguuzh doo,
per kwaan nawent nzho leen lextoo xaa.
24 Xaa kwaan nayii, chul doo nzhedizh xaa,
per naz leen lextoo xaa nzho yalnkade.
25 Nixa wen doo nii xaa, nagont lu xtizh xaa,
nel zyen doo kwaan nawent nzho leen lextoo xaa.
26 Nixa nzhak xaa nkaxlaan xaa yalnayii cheen xaa,
per lee kwaan nawent cheen xaa telise yun pa nkasa re xaa yezh.
27 Xaa kwaan keen tub yeer leeka leena la xaa;
xaa kwaan taxche tub ke leeka tich xaa laya.
28 Xaa kwaan nkade nu nayii ne wechxinn,
nu nii xaa re wdizh kwaan nadoo doo,
kwaane nle zee ralnii samyet xaa.