21
Lee xgab cheen rey nak kwenta nis kwaan nxonn, lozhya Xaa Tubka Nak,nu lee xaa nzheya naz nzhekla xaa.
2 Rese xaa nzak wen nak xgab cheen xaa,
per Xaa Tubka Nak nak xaa nlabeyy lextoo xaa.
3 Le xaa kwaan wli nu kwaan nali,
nak gon kwaan nyulara Xaa Tubka Nak ke ma kwaan nted xaa lo xaa.
4 Nzho chon kwaan nak jwalt:
yiya xaa,
to xaa yalxwa,
nu rese xgab nakap cheen xaa.
5 Gorna wen nle xaa xgab, wen nreke re kwaan,
lee gorna prad doo nle xaa xgab, zee nyayo xaa.
6 Gorna nle xaa gan kwaan lo yalnkade,
zee nyet loya kwenta zhen nu naka mod tramp pa yet xaa.
7 Lee kwaan nakap cheen re xaa nawent nluxa xaa,
nel nangulat xaa le xaa kwaan wli.
8 Nawent nak xnaz re xaa nle jwalt,
per lee re kwaan nle xaa nali, wen naka.
9 Mas wen yo xaa leen tub yoo sbaasa,
ke yo xaa leen tub yoo chul kwaan tub ngwnaa, me gaya nak.
10 Lee xaa nakap nebse nle xgab kwaan nawent,
nu nankanot xaa yalnles ne xaa wechxinn xaa.
11 Seweey xaa xaa nxizhno, zeera la kwaan yek xaa nachan
seed xaa xaa nzho yek, zee yora yek xaa.
12 Lee xaa nali ngwii garli xaa nakap,
nu ngwii xaa xomod nzha luxa.
13 Xaa nanlet kas kwaan nii xaa prob,
sbaaka nagont stub xaa kwaan nii xaa.
14 Lee gorna nselazh xaa kwaan zee nluuxa yalnayii,
leezha nselazh xaaya nu nik stub xaa nanlabeyyta.
15 Gorna naab xaa kwent nali,
zee nix nzhak lextoo xaa wen,
nu lee xaa nakap nebse nzheb.
16 Xaa mbachi lo yalnzhak
xaa zee nya pa nzho re xaa ngut.
17 Xaa nebse nzoblazh kwaan yizhyo: xis ub nu perfum,
nlake prob xaa.
18 Lee xaa nakap ded bid xlugar xaa wen nak,
nu xaa nkade ded bid xlugar xaa nzhul.
19 Mas wen yo xaa yizhyo bizh,
ke kwaan ngwnaa, me gaya nak nu me nayii nak.
20 Lee garli xaa nzhak nzho kwaan non, nu kwaan chul nzebech,
per lee xaa nachan nluux re kwaan nkano.
21 Lee xaa nreke tich kwaan wli nu tich yalnkela,
nyazhaal xaa yalnaban nu gak non xaa.
22 Lee xaa nzhak nle gan lo yezh kwaan ngezh,
nu luux xaa re kwaan nyixoob xaa lo zee dedyo xaa leen yezh lo dil.
23 Xaa nle xgab kwaan nzhedizh,
nak xaa nkanap yalnaban cheen.
24 Xwa nu gaya nak xaa nachan,
nu nto doo xaa yalxwa.
25 Lee yalnzoblazh cheen xaa nchaab nle zee yet xaa,
nel nchaab xaa nke xaa zhiin,
26 Nebse yalnzoblazh nzho yek xaa nakap dub zhe,
per lee xaa nali tubka nselazh kwaan.
27 Nangulat Dios gon cheen xaa nakap,
nel nanzaat xaaya kwaan dub lextoo xaa.
28 Lee xaa nya testig kwaan nkade nlux,
per lee xaa nkenzha, nzho mod keb xaa.
29 Lee xaa nakap nzak xaa wen nzo xaa,
per lee xaa nali nak, wen nzo xaa lo re kwaan nle xaa.
30 Nyent yalnzhak nu konsej,
kwaan nzho mod le gan lo Xaa Tubka Nak.
31 Lee kabay listla nzo mbizh yo dil,
per Xaa Tubka Nak nii cho xaa le gan dil.