20
Go xaa xis ub nle zee nakap nzhak xaa,nu lee nzoo nle nxoll xaa;
nu nik tub xaa kwaan nzho nzoo yek nalet tub kwaan nali.
2 Modxa mbazhe tub mbezh, sbaa nak yalnayii cheen rey;
xaa kwaan nle nayii xaa nle nawent leeka lo lee xaa.
3 Wen le xaa bachi xaa lo re dil,
per lee re xaa nachan nlake loya.
4 Xaa nchaab nangaant tyemp kwaan gaan xaa;
lee gorna zhin mbizh kwaan toop xaa yalgon, kwaan xaaya per nayizhalta lo xaa.
5 Re xgab cheen re myet nak mod bzo nech,
xaa kwaan nzho doo yek nkwaan mod koo nis leena.
6 Zyen doo xaa mbezh nali nak xaa,
per, nagan doo yizhal xaa tub xaa nali nak.
7 Xaa nali tubka nze tub naz nali;
wen re mad kwaan nreke tich xnaz xuz mad.
8 Gorna lee rey zob pa nabeyy xaa,
nebse laach xaa nu zeen xaa re kwaan nawent.
9 Nyent xaa nzho mod yé: "Nzhul nak na,
nankanot na jwalt".
10 Re xaa nanchiixt dub kil nu xaa nanchiixt dub litr,
ropse xaa ba nanzheklat Xaa Tubka Nak.
11 Axta re mad win nlu xomod nak mad,
che nzhul nu nali nak mad.
12 Nzha xaa kwaan nzhon xaa nu garlo xaa kwaan ngwii xaa;
rop kwaan ba chul mdexkwaa Xaa Tubka Nak.
13 Nagaat lu tant zee nagakt lu prob;
guxche zee yora kwaan gaw lu.
14 Xaa kwaan nzi mbezh: ¡Nawenta, nawenta!
lee gorna nya xaa zee nyakla xaa lo kwaan mzi xaa.
15 Nonra xaa kwaan nzhedizh kwaan yalnzhak,
ke re or nu re ke kwaan chul nzhak.
16 Chelee xaa zaa xaa diizh kix xaa dinn cheen stub xaa nanlabeyyt xaa,
nzhaal kiib xaa xchamar xaa ba, zee kix xaaya.
17 Chul doo yat kwaan nle xaa gan kwaan yalkade,
per ngwluzh nzhaka mod yux kwaan nyazhe roo xaa.
18 Kwaan konsej nle wen xaa xgab kwaan le xaa;
nu xaa ya lo dil, wen wen nzhaal gon xaa konsej.
19 Xaa ncheech diizh nagarlot kozhaw xaa tub kwaan xlaan;
nazhaalt lu kwaan re xaa nzhedizh nachan.
20 Loka cho xobde lo xuz o lo xnaa,
nabant xaa xche doo,
gak xaa mod tub bruj kwaan nyuy.
21 Gorna kayaa xaa zyen doo kwaan sbaasa liger doo,
gwluzh nagakta tub kwaan chul.
22 Nayét lu: "Nal zere na leeka kwaan nawent kwaan mle xaa lo na";
kwaz Xaa Tubka Nak, lee xaa le yud lu.
23 Xaa Tubka Nak nanzheklat xaa nanchiixt kil mod nak dub kil kwaan
nu noka xobex kwaan nalalt nga, nanzheklat xaa.
24 Xaa Tubka Nak ne nu nle re kwaan gak lo xaa,
Nyent mod ne xaa cho kwaan gak leeka lo lee xaa.
25 Nawent nak chelee tub xaa yaan zaa tub kwaan lo Dios, tub mod liger,
nu gwluzh zeera le wen xaa xgab kwaan myaan xaa.
26 Lee rey, xaa nzhak, nlabi re xaa nakap mod nzhobxtil,
zeera nted xaa molin tich xaa.
27 Mbi kwaan mzaa Dios lo myet nak xni,
kwaan nzaa xni zee labeyy xaa cho kwaan nzho axta leen lextoo xaa.
28 Tubka nabeyy rey chelee xaa nkela xaa re xaa xaa nu nali nak xaa lo re xaa,
tubka nzob rey pa nabeyy xaa chelee xaa wli nak xaa.
29 Re xaa mad nto yalxwa lo yalngezh cheen xaa,
lee re xaa gol nto yalxwa lo re yich rus kwaan nzeb yek xaa.
30 Re golp nu re pa nyaweey nsekwen re kwaan nakap kwaan nzho leen lextoo xaa,
gorna nseli xaa xaa zee nle nambeya pa mas nech leen lextoo xaa.