19
Mas wen xaa prob, xaa nali nak,ke xaa ned, xaa nle tramp.
2 Xaa nle kwaan nu nanlet xgaba, nanonta,
nu xaa nle doo prad, nla xaa lo jwalt.
3 Lee yalnachan cheen xaa nachan nluux xnaz xaa,
nu mbezh xaa: "Xaa Tubka Nak nleya".
4 Re xaa rik nzho doo xmig,
per lee xaa prob, axta nlaa xmig xaa xaa.
5 Xaa nya testig kwaan yalnkade, nkin ded xaa zee bid,
nu xaa nkade nalet xaa gan.
6 Zyen doo xaa nkwaan xjabor xaa non,
nu rese xaa nak xmig xaa nselazh kwaan.
7 Xaa prob nixa wech xaa nanzheklat xaa,
nixa re xmig xaa nankwaant xaa.
Lee gorna nkin xaa tub kwaan,
zee nyent cho le yud xaa.
8 Xaa nkwaan yalnzhak, nkela xaa leeka lee xaa,
xaa nkanap yalnzhak, nkano xaa kwaan.
9 Xaa nya testig kwaan yalnkade, nkin teed xaa xaa bid,
nu xaa nkade zluux.
10 Nawent nlu gorna lee tub xaa ned nyu pa chul nlu,
mas nawent nlu tub mos gak xaa nabeyy lo xaa non.
11 Xaa nkano yalnzhak nak xaa nyela,
nu mas non nyenlazh xaa kwaan nii xaa lo xaa.
12 Lee yalnayii cheen rey nak mod mbazhe mbezh;
lee yalnix cheen xaa nak modxa nla gop yek yix wen.
13 Lee xaa ned nle nales lextoo xuz.
nu lee ngwnaa, me gaya, nak mod pa tubka nzhunn.
14 Demi nu yoo nak kwaan nlaa xuz xaa lo xaa,
per sa xaa, me nzhak, nak kwaan nselazh Xaa Tubka Nak.
15 Lee yalnchaab nzaa doo mkaal,
nu lee xaa nchaab nyent kwaan gaw.
16 Xaa ngozhaw ley, nak xaa nkanap yalnaban cheen,
per lee xaa nankayaat xtizh Xaa Tubka Nak nzhet.
17 Tache xaa kwaan lo xaa prob,
nak mod tache xaa kwaan lo Xaa Tubka Nak.
Dios kix rese komba.
18 Seli xgann lu gorna nzho moda,
zee nakanot lu kulp lo yalgut cheen xaa.
19 Xaa nayii nyizo ded bid,
nu chelee xaa seleyy xaa xaa, zee mas nayii xaa.
20 Xaa nkayaa konsej, nak xaa nzaa yek,
nu nzhin xaa nkano xaa yalnzhak.
21 Lee myet nle xgab le zyen doo kwaan,
per Dios nle zee ne che nzhaka.
22 Non doo gak xaa nali lo xaa nyenn xaa,
mas wen gak xaa tub xaa prob ke tub xaa nkade.
23 Nzheb xaa ne xaa Xaa Tubka Nak, zee ban xaa,
zee wen doo gaa xaa, nu nakanot xaa yalnacheb.
24 Lee xaa nchaab ncheep yaa leen yann,
nu axta nyazha xaa nzhaw xaa.
25 Seweey xaa xaa nxizhno xaa, zeera la kwaan yek xaa nachan,
seed xaa xaa nzho yek, zee yora yek xaa.
26 Xaa nseweey xuz ntexonn xnaa xaa,
nak xaa nakap nu xaa nantont.
27 Xgaan, chelee lu nazaat lu yek lu lo re kwaan seed na lu,
zee bachi lu lo yalnzhak.
28 Xaa nya testig lo yalkade, nak xaa nxizhno kwaan wli,
nu lee roo xaa nakap nroo kwaan nawent.
29 Lee bid nak cheen re xaa nxizhno,
nu lee bar nak cheen re xaa nachan.