17
Mas wen gaw nales xaa nu yo xaa kwaan yalnix,ke kano xaa yalni nu yo xaa dil.
2 Tub mos xaa nkano yalnzhak, nabeyy xaa lo xgaan xaa nabeyy lo xaa, xaa ned
nu noka lee xaa nyizo re kwaan nyizo re xinn xaa nabeyy lo xaa.
3 Lee plat nle xaa preb lo ki,
nu lee or nle xaa preb lo bal,
per lee Xaa Tubka Nak nle preb lextoo xaa.
4 Lee xaa nawent nle kas kwaan nii xaa nakap,
nu lee xaa nkade nkenzha kwaan nii xaa nawent.
5 Xaa nxizhno xaa prob, nak kwenta nxizhno xaa Dios,
nu xaa nxizhno xaa gorna nzho xaa lo yalzi, xaa zee yazo yalzi.
6 Lee koron cheen re xaa gol nak re xos xaa,
lee yalnix cheen re xinn xaa nak xuz xaa nu xnaa xaa.
7 Nanont nii xaa nachan wdizh chul,
nixa nanont nii xaa non yalkade.
8 Xaa nzaa demi lo xaa zee le xaa jabor lo xaa,
nzak xaa naka tub ke cheen swert,
zee le xaa re kwaan nzhekla xaa.
9 Xaa nyenlazh jwalt cheen wechxinn nak xaa nxeen yalnkela,
per lee xaa nle nzhak grora jwalt, nle gan zee nayii xaa nyen xaa ne xaa.
10 Lee xaa nzhak nzhon diizh leezha galno xaa xaa,
per lee xaa ned, nixa tub gayoo golp yaa xaa, nanzhont xaa diizh.
11 Lee xaa ned tubka nkwaan dil,
per xaal xaa tub xaa nakap doo lo xaa.
12 Mas wen zhaal xaa tub gos, ma nayii doo, nel mkiib xaa xiin,
ke zhaal xaa tub xaa ned nu nachan.
13 Xaa nle nawent lo xaa mle wen lo xaa,
tubka yo kwaan nakap garli xaa.
14 Xaa nkwaan zelo dil, nak mod chaz xaa tub pres nu roo nis,
mas wen bachi xaa yilo zelo dil.
15 Lal xaa nzhe jwalt cheen xaa nakap nak,
nu xaa nzhib kwaan tich xaa nali nak,
ropse kwaane tira nanyulat Xaa Tubka Nak.
16 ¿Cho zhiin le demi lo tub xaa ned zii xaa yalnzhak
gorna nanlata yek xaa?
17 Tubka nkela xmig xaa xaa,
kwenta wech xaa, gorna nzho xaa lo yalnales.
18 Lee xaa ned nii kix xaa kwaan zeb xmig,
nu nzaa xaa dinn cheen xaa.
19 Xaa nyula le jwalt, nyula xaa dil,
nu xaa nzhedizh yiya, nla lo yalzi.
20 Xaa nle xgab nawent, nanyizhalt kwaan wen lo xaa,
nu lee xaa nkade nla lo yalzi.
21 Xaa nkano tub xgann ned noka kano xaa yalne,
xaa nkano xaa tub xgann nachan, nyent yalnix.
22 Nyent remed wen ke nkano xaa yalnix,
per lee yalnales nla axta leen zhit.
23 Xlaan nkayaa xaa nakap demi,
zee nanaabt xaa kwent nali.
24 Lee xgab cheen xaa nzhak nak kanora xaa yalnzhak,
per lee xaa nachan nle xgab re kwaan zit nzho.
25 Xaa ned, nales doo nded xuz xaa lo xaa,
nu nales doo nle xaa lextoo xnaa xaa.
26 Nawent gazh xaa kwaan tich xaa wen gorna naab xaa kwent,
nixa nawent seweey xaa, xaa nali nak.
27 Xaa nla kwaan yek, cheepse nii xaa,
nu xaa nzho yek, zheta nzhak xaa.
28 Axta tub xaa ned, nlu mod xaa nzhak, leezha naniit xaa,
xaa nsaaw roo, nzhak xaa nzhak.