16
Myet nle xgab kwaan leper Xaa Tubka Nak ne nen cho kwaan gak.
2 Rese kwaan nle myet xgab nzak xaa wena,
per xaa Tubka Nak ne cho kwaan nzho leen lextoo xaa.
3 Blo rese xcheen lu lozhya Xaa Tubka Nak,
zee rese kwaan nle lu xgab wen reke.
4 Rese kwaan mle Xaa Tubka Nak nkano tub chozhiin;
axta re mbizh nakap mdexkwaa xaaya zee yizo re xaa nakapa.
5 Nanzheklat Xaa Tubka Nak re xaa nto yalxwa.
telise lee xaa ded bid.
6 Kwaan yalnkela nu kwaan yalwli nzhe jwalt,
nzheb xaa ne xaa Xaa Tubka Nak zee mbachi xaa lo re kwaan nawent.
7 Leezha lee Xaa Tubka Nak nyakla ne tub xaa,
axta re xaa nayii ne xaa nle xaa kwi wen kwaan lee xaa.
8 Nonra nle xaa gan cheepse kwaan tub mod nali
ke nle xaa gan zyen doo kwaan tub mod narek.
9 Lee myet nle xgab le tub kwaan,
per lee Xaa Tubka Nak nzhe xaa xaa xnaz xaa.
10 Lee kwaan nii rey nak kwaan mbezh Dios lo xaa;
lee roo xaa nii kwaan nali.
11 Kil kwaan drech mbix nak tub kwaan nali lo Xaa Tubka Nak
nu lee xaa mdexkwaa re kwaan nchiix xaa.
12 Lee rey nanyulat xaa nakap,
nel pa nzob xaa nzhaal nali naab xaa kwent.
13 Re rey nkela nu wen ngwii lo re xaa nzhedizh nali;
wen ne xaa re xaa nii kwaan wli.
14 Yalnayii cheen rey nak kwaan nzhe xaa lo yalgut,
per lee xaa nkano yalnzhak ne xomod nzhak zheta.
15 Lee garlo rey kwaan nix nlu nak yalnaban;
nu lee jabor cheen xaa nak mod xkaw kwaan nkano doo yey.
16 Wenra xaa nkwaan zee yo doo yek ke or;
wenra xaa nkwaan kano yalnzhak ke plat.
17 Lee xnaz xaa nali nak mbachi lo re kwaan nawent;
xaa kwaan ngwii pa naz nzha nkanap xaa yalnaban cheen xaa.
18 Xaa nto yalxwa nzhin nyalo nlux,
nu xaa yiya nak ndenke.
19 Nonra le xaa nadoo xaa nu nzho xaa kwaan re xaa prob
ke gak rik xaa nu zen xaa kwaan mlewann xaa kwaan re xaa nto yalxwa.
20 Xaa kwaan nzaa yek nzhon diizh wen nded xaa
wen re xaa kwaan ngwii lo Xaa Tubka Nak
21 Xaa kwaan wen nle xgab re kwaan, nii re xaa nzho yek xaa;
re xaa nzhedizh nadoo le gan re myet.
22 Xaa yilo nle xgab zeera le tub kwaan xche doo ban xaa,
re xaa ned ded bid lo yalned cheen xaa.
23 Xaa kwaan wen nle xgab re kwaan ne xaa cho kwaan nii xaa
nu mod nzhedizh xaa wen nzhak.
24 Re wdizh kwaan nadoo nak tub lag mzhin,
naxa leen lextoo xaa nu nzaaya yalngezh.
25 Nzho naz nzak re myet wen nak,
per naz zee nzhe xaa xaa lo yalgut.
26 Lee yalnlaan nle zee nke xaa zhiin,
nel nzhekla xaa kwaan gaw xaa.
27 Xaa kwaan nakap nle xgab xomod le xaa kwaan nawent;
re wdizh kwaan nroo roo xaa nak mod luzh bal.
28 Xaa kwaan nakap nkwaan dil
xaa nkwaan diizh nle nrexcho xaa nyen xaa.
29 Xaa naras nkade wechxinn xaa,
nu nzhe xaa xaa lo naz nawent.
30 Ntiib xaa garlo xaa nu nle xaa xgab le xaa kwaan nawent,
nzhawye xaa roo xaa mod nseyn le xaa kwaan nawent.
31 Re yich rus nak mod koron yek xaa kwaan chul nlu;
nel nluya xche doo mban xaa tub mod nali.
32 Nonra gak xaa tub xaa nyela ke gak balyent xaa
nonra seli xaa xaa ke le xaa gan tub yezh lo dil.
33 Myet nle xgab koo swert,
per lee Xaa Tubka Nak nii xomod gaka.