15
Lee wdizh nadoo nle zheta nzhak yalnayii,per lee wdizh nakap nle zee masra nayii xaa.
2 Lee roo xaa nzhak nroo nebse yalnzhak,
per lee roo xaa ned nroo nebse kwaan nachan.
3 Lee Xaa Tubka Nak ngwii dubse pa,
ngwii xaa lo re xaa wen nu lo xaa nakap.
4 Xaa wen nzhedizh nak kwenta yag cheen yalnaban,
per lee xaa nzhedizh kwaan nakap nle nales lextoo re xaa.
5 Lee xaa ned nankayaat xkonsej xuz xaa,
per lee xaa nkayaaya nlu yalnzhak.
6 Lee garli xaa nali nzho doo kwaan,
per lee xcheen xaa nakap nyaadno dil.
7 Lee xaa nzhak nii kwaan yalnzhak,
per lee xaa ned nanlet xgab yalnzhak.
8 Nankayaat Xaa Tubka Nak gon cheen xaa nakap,
per nyula xaa kwaan nii xaa nali nak.
9 Xaa Tubka Nak nanyulat xnaz xaa nakap,
per nkela xaa re xaa nreke tich kwaan wli.
10 Nakap nzhaal seli xaa xaa nlaa naz cheen yalnzhak;
nu xaa nanyulat seli xaa, nzhaal yet.
11 Xaa Tubka Nak ngwii roo baa nu pa nya re xaa nzhet,
sbaaka ngwii xaa lo re xgab cheen myet.
12 Xaa nto yalxwa nanyulat xaa seed xaa xaa,
nixa nanzhaalt xaa kwaan re xaa nkano yalnzhak.
13 Xaa nkano yalnix, axta garlo xaa chul nlu,
xaa nkano yalnales, axta garlo xaa nales nlu.
14 Xaa nla kwaan yek, nkwaan yalnzhak,
per lee xaa ned nebse kwaan nachan nzhiib roo xaa.
15 Xaa nales nzhak, rese mbizh nawent lo xaa;
per lee xaa nkano yalnix, tubka nzho xaa yalni.
16 Mas wen gak prob xaa nu gon xaa xtizh Xaa Tubka Nak,
ke kano xaa zyen doo kwaan nu yo xaa dil.
17 Wenra gaw xaa yix naye paro nzho yalnkela,
ke gaw xaa baal ngoon paro nzho dil.
18 Xaa gaya nak, nak xaa nkwaan dil,
per lee xaa nyela, nle xaa zee nzhak wen re xaa.
19 Lee lo xnaz xaa nchaab nzho doo yich,
per lee lo xnaz xaa nali, nak naz naxen.
20 Nix nzhak lextoo xaa gorna nkano xaa tub xinn xaa mad nzhak,
per lee xaa ned nle zee nton xaa.
21 Lee xaa ned nzhak nix lo yalned cheen,
per lee xaa nzho yek, nseli xnaz.
22 Leezha nyent xaa zaa konsej, zee nyayo xgab,
lee gorna nzho doo xaa nzaa konsej, zee nzhak re kwaan.
23 Wen doo keb xaa wdizh, gorna nzhaala,
nu masra wena gorna nkina.
24 Lee xaa nkano yalnzhak nya naz yiba,
zee nanyat xaa naz lo yalgut.
25 Xaa Tubka Nak nluux li re xaa nto yalxwa,
per nkanap xaa xkizhyo re byud.
26 Nanyulat Xaa Tubka Nak xgab cheen re xaa nakap,
per nyula xaa wdizh cheen xaa nali.
27 Lee xaa nzoblazh lewann nluux li,
per lee xaa nanzhont diizh kiil, mban zyen liin.
28 Lee xaa wen nak chawlazh nle xgab kwaan keb,
per lee xaa nakap nebse nii zyen kwaan nawent.
29 Zit nzo Xaa Tubka Nak lo re xaa nakap,
per nzhon xaa kwaan nii re xaa nali nak.
30 Gorna chul ngwii xaa, zee nix nzhak lextoo xaa,
nu lee re wdizh chul nzaa yalngezh lo xchit xaa.
31 Xaa nzhekla kano yalnzhak, nkayaa re kwaan seed xaa xaa,
zee tubka nzho xaa kwaan re xaa nzhak.
32 Xaa nanyulat gon diizh, nankelat xaa leeka lee xaa,
per lee xaa nzeyal nzhon diizh, nak xaa nkanora yalnzhak.
33 Xaa nzheb ne Xaa Tubka Nak nseed yalnzhak,
nu lee yalnadoo nle zee wii xaa respet lo xaa.