14
Lee ngwnaa nzhak nza me li me;per lee me ned kwaan yaa me nluux meya.
2 Xaa kwaan nali nzheb xaa ne xaa Xaa Tubka Nak;
xaa kwaan nze naz nawent nanzheklat xaa xaa.
3 Duzna yalxwa nzhedizh re xaa ned, zee nla xaa bar tich xaa;
re xaa kwaan nkano yalnzhak nkanap re kwaan nii xaa xaa.
4 Leezha nyent ngoon nyent yalgon;
kwaan yalngezh cheen ngoon zee nyu gro yalgon.
5 Lee testig, xaa wli, tira nankadet;
per lee testig, xaa nkade, nii yalkade.
6 Xaa kwaan nto yalxwa nkwaan xaa yalnzhak per nanyizhalta lo xaa,
per lee lo re xaa list, lee yalnzhak nak tub kwaan nanagant lo xaa.
7 Bachi lo re xaa ned,
nel nik tub kwaan naseedt lu lo xaa.
8 Lee yalnzhak cheen xaa list, wii xaa cho kwaan nle xaa,
per lee xaa ned leeka yalned cheen xaa nkade xaa.
9 Re xaa ned nxizh lo jwalt cheen xaa,
per lee re xaa nali nak nyakla Dios ne.
10 Nebse lextoo xaa nlabeyy re yalnales cheen xaa,
sbaaka nik stub xaa nanlabeyyt yalnix cheen xaa.
11 Garli re xaa nakap telise lux,
per lee yoo yed cheen re xaa nali tira gak.
12 Nzho naz kwaan nzak xaa wen nak,
per lee paro nzhina nak lo yalgut.
13 Gorna nxizh xaa seetaka nzho yalne lextoo xaa,
nu nzho yalnix kwaan nzhe xaa lo yalnales.
14 Kwaan nzaa lextoo re xaa ned nak xle nawent kwaan nyazhe lextoo xaa;
per kwaan nzaa lextoo re xaa wen nak kwaan wen.
15 Xaa nachan nle krer rese kwaan nii xaa lo,
per lee xaa list ne paro nzha.
16 Xaa nzhak nzeen kwaan nawent nu mbachi loya,
per lee xaa ned yiya doo nzhak nu sbaaga nle xaa kwaan.
17 Xaa kwaan lijer doo nayii, nle xaa re kwaan sbaaga,
xaa kwaan nle xgab cho kwaan nle, nyela xaa.
18 Kwaan yizo re xaa nachan nak yalned cheen xaa;
kwaan le xaa list gan nak yalnzhak.
19 Re xaa nakap kichyek lo re xaa wen;
re xaa naxinn kichyek roo pwert cheen re xaa nali.
20 Re xaa prob axta re xmig xaa nii nawent xaa,
per lee re xaa rik zyen doo xaa nzhekla xaa nel rik xaa.
21 Xaa kwaan nanzheklat wechxinn naka jwalt,
wen re xaa kwaan nkano yalnles lo re xaa nales nzhak.
22 Xaa kwaan nzhekla le kwaan nawent ngan xaa naz,
xaa kwaan nle xgab wen yizhal xaa yalnkela nu kwaan wli.
23 Nle xaa gan kwaan gorna dubse jwers cheen xaa zob le xaaya,
per chelee xaa nebse wdizh xaa lake xaa prob.
24 Koron cheen xaa nzho yek nak yalnzhak cheen xaa;
lee kwaan nzho yek re xaa ned nak yalned cheen xaa.
25 Lee testig, xaa wli, nle yud stub xaa,
per testig, xaa nawlit, nkade.
26 Xaa kwaan nzheb ne Xaa Tubka Nak, nkano xaa tub yoo nye nak
kwaan nkanap lee xaa nu re xinn xaa.
27 Xaa kwaan nzheb ne Xaa Tubka Nak xche doo ban,
nu nanlata xaa la xaa lo yalgut.
28 Tub yezh kwaan zyen xaa nzho nyakla rey
per lee yezh pa nzho cheepse xaa nankanot xaa jwers.
29 Xaa kwaan nen doo nayii nla kwaan yek xaa zee;
xaa kwaan liger nzhaal xyan nlu doo xaa yalnachan cheen xaa.
30 Leezha wen xgab cheen xaa wen dub xaa,
lee yalnayii nluux xchit xaa tira.
31 Xaa kwaan nkiib kwaan lo xaa prob nxizhno xaa Dios,
per lee xaa wen nle lo re xaa prob, nle non xaa zee Dios .
32 Xaa nakap la leeka lo kwaan nawent cheen xaa;
per lee xaa nali nkanap Dios xaa axta gorna yet xaa.
33 Lextoo re xaa nzho yek nzho yalnzhak,
per lee re xaa ned nixa nanlabeyyta.
34 Xaa nali nak nle zee wen nzhak yezh cheen xaa,
lee xaa nle jwalt nak yalnto cheen yezh.
35 Lee rey nle wen lo xmos xaa, xaa nzhak,
per nayii xaa lo xmos xaa, xaa nseton xaa.