13
Xaa kwaan nkano yalnzhak, nkayaa xkonsej xuz,per lee xaa nto yalxwa nanlet kas gorna ngalno xaa xaa.
2 Xaa wen nzhedizh, wen mban xaa,
per lee xaa nakap nzoblazh le kwaan nawent.
3 Xaa nle xgab kwaan nzhedizh, nak xaa nkanap leeka lee xaa.
per lee xaa nzhedizh doo nyayo.
4 Lee xaa nchaab nzoblazh, per nik tub kwaan nanlet xaa gan,
per lee xaa nke zhiin nkano zyen kwaan.
5 Lee xaa wen nankayaat yalnkade,
per lee xaa nakap nebse ngoo yalnto nu nle xaa re kwaan nanyulat myet.
6 Lee kwaan nali nkanap xaa nali nak,
per lee kwaan nakap nluux xaa nle jwalt.
7 Nzho xaa mbezh nak rik, per nankanot xaa kwaan,
nzho xaa nlu mod xaa prob, per nzhap doo xaa kwaan.
8 Lee kwaan nzhap rik nle yud xaa gorna nzhekla xaa le kwaan nawent lo xaa,
per lee xaa prob cho nii le kwaan nawent lo xaa.
9 Lee xaa wen nak kwenta xni,
per lee xaa nakap nak kwenta bruj kwaan nyuyy.
10 Lee xaa nto yalxwa nebse nkwaan dil,
per lee yalnzhak nzho lo xaa nadoo.
11 Demi nle xaa gan lo yalkade lijer nlux,
per lee xaa cheepga ngozhawa nzhak rik.
12 Nzho yalnales gorna nanzhakt re kwaan nkambaz xaa,
per mod yag cheen yalnaban nak gorna nzhak re kwaan.
13 Xaa nanlet kas tub ley, zlux xaa zee,
per lee xaa nzhon diizh, nyazo kwaan wen.
14 Lee kwaan nlu xaa nzhak nyaadno gro doo yalnaban,
nu ngooya xaa lo cheen yalgut.
15 Xaa nzaa konsej wen nkano doo mig,
per lee xnaz xaa nakap naxinn nak.
16 Kwaan yalnzhak nle xaa nzhak re kwaan,
per lee xaa ned nto yalxwa lo yalned cheen.
17 Lee mandad, xaa nakap, nebse nkwaan dil,
per lee mandad, xaa nali, ngoo xaa lo dil.
18 Xaa nankayaat konsej, nyilo nzhak prob xaa nu nkano xaa yalnto,
per lee xaa nkayaa konsej, nzhak xaa tub xaa non.
19 Nzho yalnix gorna nzhak re kwaan kambaz xaa,
per lee xaa ned nyula kwaan nawent.
20 Xaa nyen xaa nzhak, nkano yalnzhak,
per lee xaa nyen xaa ned, nyayo.
21 Lee kwaan nakap nreke tich re xaa nle jwalt,
per lee xaa nali nkayaa kwaan wen.
22 Lee xaa wen nak, nlaa kwaan lo re xos,
per lee xcheen xaa nzeb jwalt nlake lo xaa wen.
23 Lee pa ngaan xaa prob nzho doo kwaan gaw xaa,
per nluxa gorna nanlet xaa kwaan nali lo xaa.
24 Xaa nanselit xinn nakelat xaa zee xinn xaa,
per xaa nkela xinn, nseli xaa mad.
25 Lee xaa nali nzhaw axta paro nyazhe lextoo,
per lee xaa nakap nlake kwaan yalnlaan.