12
Xaa nyula nseli xaa xaa, nyula xaa zee yalnzhak;xaa kwaan nanzheklat galno xaa xaa, nachan xaa zee.
2 Xaa wen nak, nyakla Xaa Tubka Nak ne,
per lee xaa nawent nle xgab, Xaa Tubka Nak nzaa kwaan nyazo xaa zee.
3 Nanyet nzo xaa nle kwaan nawent,
per lee lox re xaa nali tira naluxt.
4 Ngwnaa me nali lo sa nak koron cheen sa me,
per lee ngwnaa me nakap nak mod mbaz ma nzho leen xchit xaa.
5 Re xgab cheen re xaa nali, nali nak,
per lo konsej cheen re xaa nakap nzho yalkade.
6 Xtizh re xaa nakap nak mod tramp kwaan nluux xaa,
per lee roo re xaa nali nle yud xaa.
7 Re xaa nakap nlux nu nambantra xaa,
per lee xinn re xaa nali tira nak.
8 Kwent cheen yalnzhak cheen xaa nzholl xaa lo xaa,
per nanzheklat re xaa xaa nakap nak lextoo.
9 Nonra tub xaa sbaasa, xaa nkano xaa nke zhiin lo,
ke tub xaa nto yalxwa nu nankanot kwaan gaw.
10 Xaa nali nak nkanap xaa xkoon xaa,
per lee xaa nakap nak nanlest lextoo xaa.
11 Xaa kwaan nlee xkizhyo, yo zyen doo kwaan gaw,
per lee xaa sbaasa nzo, nyent yek xaa zee.
12 Lee yalnzoblazh nak tramp cheen re xaa nakap,
per lee xaa nali nak, nak mod yag kwaan nzaa zyen doo xle.
13 Re yalkade kwaan nii xaa nakap nle zee luux xaa leeka lee xaa,
per lee xaa nali nak nroo lo re yalzi.
14 Wen nded xaa nii kwaan wen,
nu nkayaa xaa kwaan yexka xaa lo kwaan mle xaa.
15 Xaa ned nle xgab lee rese kwaan nle xaa wen nak,
per lee xaa nali nak nzhon re konsej.
16 Xaa ned lijer doo nayii xaa,
Per lee xaa list nawiit lo kwaan nxizhno xaa xaa.
17 Xaa kwaan nii kwaan wli mbezh nali nak kwaan,
per lee xaa kwaan nkade nii yalkade.
18 Nzho xaa lee xtizh nak mod kuchi kwaan nseweey,
per lee xtizh re xaa nzhak nak mod remed.
19 Xaa kwaan nii kwaan wli tira ban xaa;
per lee re xaa nkade cheepse mban.
20 Lo xgab cheen re xaa nakap nzho yalkade,
per lo re xaa wen nle xgab nzaa konsej zee nzho yalnix.
21 Lo re xaa nali nak nadedt nik tub kwaan nawent,
per lee lo re xaa nakap tubka nzhin kwaan nawent.
22 Lo Xaa Tubka Nak re xaa nkade nak xkap,
per nyula xaa re xaa nali nak.
23 Xaa list nanlut xaa re kwaan nzhak xaa,
per lee xaa ned nlu xaa re yalned cheen xaa.
24 Xaa kwaan nke doo zhiin nabeyy,
per lee xaa nchaab nabeyy stub xaa lo xaa.
25 Lee yalnacheb nle nzhak nales xaa,
per lee wdizh nadoo nzaa yalnix lo xaa.
26 Xaa nali nzhak nzhe wechxiin,
per lee re xaa nakap nzhe xaa lo naz nawent.
27 Nayigat ma lo xaa nchaab leezha nya xaa kompyar;
per lee xaa nke doo zhin nkano doo xaa kwaan.
28 Naz cheen yalnali nzho yalnaban,
nyent yalgut lo naz cheena.