Yalnzhak cheen Salomón
10
Yalnzhak cheen Salomón:Nix nzhak lextoo xaa gorna nkano xaa tub xinn xaa mad nzhak,
per lee mad ned nle zee nzhak nales lextoo xaa.
2 Re demi kwaan nawent nle xaa gan nandelota,
per lee kwaan wli nsela xaa lo yalgut.
3 Xaa Tubka Nak nanlaat ded xaa nali bid lo yalnlaan,
per nanzaat xaa lo re xaa nakap kwaan nzoblazh xaa.
4 Cheleeya cheepse ke xaa zhiin nakanot xaa kwaan
per cheleeya ke doo xaa zhiin kano doo xaa kwaan.
5 Xaa kwaan ntoop yalgon tyemp cheena nzho yek xaa zee,
per lee xaa nzha gorna ndoop yalgon nak xaa ngoo xkalnto re xaa li xaa.
6 Nzho doo kwaan lo re xaa nali nak,
per lee lo re kwaan nii re xaa nakap nzholaan re kwaan nawent.
7 Nii wen xaa gorna nselazh xaa xaa nali nak,
per lee le xaa nakap nixa nanselazht xaa xaa.
8 Xaa kwaan nkano yalnzhak nkayaa xley Dios,
per lee xaa ned nzha naz kwaan luux xaa.
9 Xaa kwaan nik tub kwent nankanot nanzhebt xaa,
xaa kwaan nawent nzha, zhin mbizh klar luuya lo re xaa.
10 Xaa kwaan ntiib garlo nle xaa nseyn xlaan, nded xaa bid,
nu lee re xaa nzhedizh doo roo xaa nluux xaa.
11 Lee lo kwaan nii re xaa nali, nzho gro doo yalnaban,
per lee lo re kwaan nii re xaa nakap nzholaan kwaan nawent.
12 Lee yalnayii nkwaan dil,
per lee yalnkela nsaaw lo rese kwaan nawent.
13 Roo re xaa nzhak nzho yalnzhak,
lee bar nkin la xaa tich re xaa ned.
14 Re xaa nzhak ngozhaw yalnzhak,
per lee re xaa ned nebse nzhedizh zee luux xaa.
15 Yalrik nak mod tub yezh kwaan wen nsaaw bla cheena,
lee yalprob nak kwaan luux xaa nyent kwaan lo.
16 Lee kwaan le re xaa nali gan nak yalnaban,
per lee kwaan le re xaa nakap gan nak jwalt.
17 Gon xaa diizh nak naz kwaan wee xaa lo yalnaban,
xaa kwaan nanzhont diizh nyayo xaa.
18 Re xaa nkade ngolaan xaa yalnayii cheen xaa,
re xaa nchech diizh nak xaa nachan.
19 Gorna nzhedizh doo xaa nzho mod le xaa jwalt lo re kwaan nii xaa,
xaa nzhak nkanap roo xaa zee nanzhedizht xaa tant.
20 Re kwaan nii re xaa nali nak mod neb plat,
per lee xgab cheen re xaa nakap nanont nik tik.
21 Roo re xaa kwaan nali nak nseed zyen doo xaa,
per lee re xaa ned nzhet nel nyent yalnzhak lo xaa.
22 Lee yalwen cheen Xaa Tubka Nak nak nle rik xaa,
nu nik tub kwaan nalet xaa xgab.
23 Xaa ned nyakla xaa gorna nle xaa kwaan nawent,
per lee xaa kwaan nkano yalnzhak nyakla xaa lo yalnzhak.
24 Re kwaan nzheb xaa nakap ne, kwaanzee zhin lo xaa,
per lee lo re xaa nali zaa Dios kwaan nzhekla xaa.
25 Nded mdun nu sbaa nzheya xaa nawent,
per lee xaa nali tira nak.
26 Mod xis ub kwaan nala kwaan nla lo keleyy xaa nu mod zhen kwaan nyu garlo xaa,
sbaa nak xaa nchaab lo xaa mxaal xaa le xaa tub kwaan.
27 Xaa kwaan nzheb ne Xaa Tubka Nak xche doo mban xaa,
per lee liin cheen re xaa nakap nle xaa cheepse.
28 Lee kwaan nkambaz xaa nali ded nu gak nix lextoo xaa,
per lee kwaan kambaz xaa nakap nak nadedta lo xaa.
29 Lee naz nali cheen Xaa Tubka Tubka Nak kwaan saaw xaa nali,
per luux xaa re xaa nakap.
30 Re xaa nali nak tira naralt nii xaa,
per lee re xaa nakap nayot xaa xche lo yizhyo.
31 Yalnzhak nroo roo re xaa nali nak,
per lee roo re xaa nakap saaw xaa.
32 Roo re xaa nali nroo re wdizh wen,
per lee roo re xaa nakap nzhedizh duzna re wdizh naxinn doo.