Yalnzhak nu yalnachan
9
Lee yalnzhak nak kwenta tub ngwnaa, me mdexkwaa li,nu mkaww me gazh yizo mzo choya.
2 Mbit me ma gaw me nu mguch me xis ub me,
nu mlek meya lo mes.
3 Mxaal me re me nke zhiin lo me,
nu lo pa mas ya nzeb lo yezh nii me nye:
4 "Te gu lo na xaa nachan"
mbezh me lo re xaa nanlat kwaan yek.
5 "Te gu, gaw gu yat cheen na,
nu go gu xis ub kwaan mguchniz na.
6 Blaa gu, nagaktra gu xaa nachan, zee ban gu;
zee ze gu lo naz cheen yalnzhak.
7 Xaa nseli xaa nxizhno xaa, le xaa gan diizh nawent nii xaa lo xaa,
nu xaa ngalno xaa ned, nle gan yalnayii.
8 Nagalnot lu xaa nxizhno xaa, zee nayiit xaa ne xaa lu,
bgalno xaa nzhak, zee kela xaa lu.
9 Bseed xaa nzhak, zee kanora xaa yalnzhak,
bluya lo xaa nali, zee yora yek xaa.
10 Lee yalnzhak nzelo lextoo xaa nzheb ne Xaa Tubka Nak,
labeyy xaa Xaa Nzhul Doo, nak kano xaa yalnzhak.
11 Nel kwent cheen na gak zyenra xmbizh lu,
nu kwibra zyen liin lo liin kwaan ban lu.
12 Chelee lu nkano lu yalnzhak, naka kwaan wen leeka lo lu,
nu chelee lu ned lu, techo lu kixa.
13 Lee yalned nak kwenta tub ngwnaa, me nye doo nii,
nu nak me me nanalit nu nixa nakanot me nik tik yalnzhak.
14 Nzob me lo tub yagxil roo li me,
pa yara nzeb lo yezh nzob me,
15 zee kwezh me re xaa nzeded lo naz,
nu mbezh me re xaa nali nzha naz:
16 "Te gu lo na, xaa nachan"
mbezh me lo re xaa ned.
17 "Nax doo ndee nis kwaan nlewann xaa,
nu kwenta mzhin ndaaw yat,
gorna xlaan nzhaw xaaya."
18 Per nanet re xaa lee baa nzho xaa ngut,
nu lee xaa mrezh me zee la axta xan yeer.