Mbezh yalnzhak lu
8
¡Lee yalnzhak nak mod tub ngwnaa me kabezh xaa!¡Nye kanii yalnzhak!
2 Yalnzhak nak kwenta tub ngwnaa, me nzo roo naz
o nzo me pa zhaal re naz,
3 nu nzo me roo pwert pa nzeeb xaa leen yezh,
nu roo yezh nkee me bi nu nzhé me:
4 "Rese gu, kabezh na,
lo rese gu kanii na.
5 Xaa nachan, laa la kwaan yek gu;
nu xaa ned ble gu zee gak list gu.
6 Kenzha, nel lee na nii kwaan non lo gu
nu kwaan roo na ni na kwaan wli.
7 Nel duzna kwaan wli nzhedizh na,
nu nanyawlat na kade na.
8 Rese kwaan nzhedizh na nali nak;
nyent kwaan nawent lo na nu nixa nacheet na xtizh na.
9 Wli naka lo xaa kwaan nlaya yek,
nu nali naka lo re xaa kwaan nkano yalnzhak.
10 Nonra kayaa xaa xtizh na ke plat
nu nonra kayaa xaa yalnzhak ke or.
11 Nel xwara yalnzhak lo re ke kwaan non doo,
nu nixa re kwaan mas non nagakt lal kwaan yalnzhak."
12 "Na nak yalnzhak nu nzho na kwaan xaa nzho yek
nu nlabeyy na konsej nu nlabeyy na re kwaan nzhaal le xaa.
13 Xaa kwaan nzheb ne Xaa Tubka Nak nayii ne kwaan nakap,
nel nayii na ne na yalxwa nu re xaa yiya nak
nu nayii na ne na naz nawent nu roo re xaa nkade.
14 Cheen na nak konsej nu kwaan wli
Na nkano yalnzhak nu yalnabeyy.
15 Na nle zee nabeyy re rey
nu re xaa non naab kwent nali,
16 kan na nle zee nabeyy re xaa non
nu re xaa nabeyy naab kwent nali lo xaa yizhyo.
17 Na nkela re xaa kwaan nkela na
nu re xaa nkwaan na yizhal na lo xaa.
18 Lo na zee nzhak rik xaa nu nzhak non xaa,
nu nkano xaa re kwaan ndii tira nu yalnali.
19 Re kwaan nza na nonra lo or, kwaan neb or nak,
nu nonra re kwaan nza lo kwaan neb plat nak.
20 Nzee na naz kwaan nali nak,
naz kwaan nali naab kwent,
21 zee za na lo xaa nkela na zyen kwaan,
nu le na rik xaa.
22 'Xaa Tubka Nak mdexkwaa na mod xle kwaan yilotlaka lo xchinn xaa,
axta yilo gorna zeraka dexkwaa xaa re kwaan.
23 Axta yilo mdexkwaa xaa na,
gorna zeraka kaxkwaa xaa yizhyo;
24 zeraka yo nistoo kwaan nech doo, lee na ngola,
gorna zeraka yo yuu nu pa nzhiib nal nis.
25 Gorna zeraka dexkwaa xaa re yi ndok
nu zeraka kwi re yi chuut, lee na ngola;
26 zeraka dexkwaa xaa yizhyo nu wen
nu nixa zeraka zelo yide gak lo yizhyo.
27 Leezha mdexkwaa xaa paro nzhaal yiba kwaan nistoo,
nzola na.
28 Leezha mlek xaa xkaw yiba
nu mxal xaa xlen xan nistoo pa mas nech,
29 leezha ngunabeyy xaa nistoo zee nadedyota paro nzhaala kwaan yizhyo;
leezha mlek xaa xan yizhyo,
30 na mle yud xaa gorna mdexkwaa xaa rese kwaan.
Yizata mbizh nzhak nix lextoo xaa ne xaa na
nu tubka nyakla na nzo na lo xaa.
31 Nyakla na nzo na lo yizhyo gorna mdexkwaa xaa myet,
nix doo nzhak lextoo na ngwii na lo re myet lo yizhyo.
32 'Lee nal kenzha gu, xgaan
wen re xaa kwaan nze xnaz na.
33 Kenzha xtizh na zee kano lu yalnzhak
nu nalaat luya.
34 Wen re xaa nkenzha xtizh na
nu yizata mbizh list nzo xaa roo li na
nu roo li na tubka mbaz xaa.
35 Loka cho yizhal na lo noka yizhal yalnaban lo xaa,
nu yizo xaa kwaan wen lo Xaa Tubka Nak;
36 per loka cho le jwalt lo na leeka lee xaa le nawent lo xaa,
nel loka cho laa na nkela xaa zee yalgut.