Mayn cheen me nto cho
7
Xgaan, bin xtizh na,nu kozhaw xley na.
2 kozhaw xley na, zee ban lu,
nu kozhaw kwaan mseed na lu,
modxa nkanap lu nin zaalo lu.
3 Beya re kwen yaa lu mod tub ani,
nu kozhawa lextoo lu.
4 Guzh lo yalnzhak: "Lu nak bzan na",
nu guzh lo yalnzhak: "Lu nak sawlizh na".
5 Zee kozhawa lu lo me nto cho,
nu lo sa stub xaa, me chul doo nzhedizh.
6 Tub mbizh kawii na bentant,
nu mwii na
7 lo lak xaa mad xaa nachan;
nu lo re xaa mad ba mwii na
lo tub xaa nzho jwalt yalnzhak yek.
8 Lee gorna mded xaa skin naz mzen xaa naz,
nu nzha xaa nalise garli xngwnaa stub xaabyi.
9 Nzezhel yizhyo nu nyaaz mbizh,
nu merla la yalnakaw.
10 Zee lee ngwnaa mroo,
nlu me kwenta me nto cho
nu me nkano xgab nawent.
11 Nak me tub ngwnaa, me nantont nu naras,
nu nambazt me yoo.
12 Welt nzo me leen naz nu rol welt nzo me lo xbi,
nu nzo me skin naz, zee zen me xaa ded.
13 Mdeezh me xaa mad nu ndaw me tub bit roo xaa,
nu ni nantont me nzhé me lo xaa:
14 "Mzala na gon zee zo wen na,
lee nal ngulola mle naya nu nzho baal garli na;
15 Kwaanzee nzhal kwaan na lu,
mkwaan na lu nu nguzhal lu lo na.
16 Mdexkwaa na lo xloon na
kwaan ler chul doo kwaan nze naz Egitpo,
ler kwaan re kolor.
17 Mchub na perfum loya,
kwaan bech cheen mirra, aloe nu cheen kanel.
18 Te, zee dub yaal yo be,
nu le be gust axta yani yizhyo,
19 nel lee sa na nyent yoo,
nu nzha xaa tub byaj zit doo.
20 Nzhano xaa tub boons demi,
nu nabaret xaa nal, axta gorna ke mbee yeen."
21 Snee mkiil me xaa kwaan wdizh chul doo,
nu mle me zee mla xaa lo tramp cheen me.
22 Nu mreke xaa tich me,
kwenta ngoon, ma nzha gut xaa,
mod mzhin, ma nyiga lo tramp,
23 gorna nyaaz kwaan nkee wez lextoo ma,
kwenta myin, ma nzha nalise lo yex,
nu nanet ma che baa yet ma.
24 Lee nal kenzha gu, xgaan;
kenzha gu kwaan nii xtizh na:
25 Nayat gu lo xnaz me,
nixa nayot naz cheen me yek gu;
26 nel zyen doo xaa nzhayet kwent cheen me,
nu zyen doo xaa sbaa nzha le me.
27 Lee garli me nzha nalise roo baa,
nu nzhaya lo naz cheen yalgut.