Ble kwaan nii lu
6
Xgaan, chelee lu nzhe lu kix kwaan nzeb xmig lu,nu chelee lu myaan lu kwaan xaa zit le luya,
2 nu chelee lu mla lu lo tramp kwent cheen kwaan ngunii lu,
nu kwaan leeka roo lu mle mla lu lo tramp.
3 Zeesi xgaan, kwaane le nal, zee roo lu lo kwaan ba,
nexa per nzhola lu yaa wechxinn lu.
Gwa nguni nadoo lo wechxinn lu
nu naab lu zee sela xaa lu lo kwaan myaan lu.
4 Nagaat lu nik tub rat,
nixa nalaat lu diib garlo lu.
5 Bxonn modxa nxonn tub mzhin lo xaa nya kompyar,
bxonn modxa nxonn tub myin lo xaa nzob tramp.
6 Xaa jwloj, wii lo re mrii;
wii lo re kwaan nle ma nu zob le xgab.
7 Nankanot ma cho nabeyy lo ma,
nixa nankanot ma cho nii lo ma cho kwaan le ma.
8 Bayey ntoop ma kwaan nzhaw ma
dubse tyemp leezha nzhoya ntoop maya.
9 Xaa jwloj, ¿zlak gor seese gaa lu?
¿Pa gor roo mkaal lo lu?
10 Cheep gaa lu, cheep chaa lextoo lu,
nu cheep keezh lu yaa lu zo lu sbaasa,
11 zee sbaa zhin lu gak lu prob nu gak nales lu,
lee yalprob la lo lu mod tub wann.
12 Xaa nakap nu xaa nantont
nzha nzhedizh yalkade.
13 Ntiib xaa garlo xaa nu nle xaa nseyn kwaan nii xaa
nu kwaan yaa xaa nle xaa nseyn.
14 Nebse kwaan nawent nzho lextoo xaa,
nu dub mbizh nle xaa xgab yalkade;
nu duzna dil nkwaan xaa.
15 Kwaanzee zhega nzhin yalzi lo xaa
nu lux xaa nu nyent cho le yud xaa.
16 Nzho xoop kwaan nanyawlat Xaa Tubka Nak
nu axta gazha nak kwaan zere xaa lextoo xaa:
17 re xaa kwaan xwa doo nle,
luzh re xaa kwaan kade,
re xaa kwaan nzhut samyet kwaan nik tub kwaan nakalet,
18 re xaa kwaan nle xgab le kwaan nawent,
re xaa kwaan nii xaa nrexonn xaa nle xaa kwaan nawent,
19 re testig xaa nawlit, xaa nii yalkade
nu re xaa nkwaan dil lo re wech.
Kanap lu lo me nto cho
20 Xgaan, bin xtizh xuz lu,
nu nalaat lu kwaan mseed xnaa lu lu.
21 Tubka blozhawa leen lextoo lu,
nu tubka loya yenn lu.
22 Nzhanoya lu pa nzha lu,
nu nkanapa lu gorna gaa lu
nu niiya lo lu gorna nyixche lu.
23 Lee kwaan ni na nak mod tub bruj
nu lee xtizh na nak mod xni,
nu re konsej kwaan nseli xaa nak naz cheen yalnaban.
24 zee kanapa lu lo ngwnaa me nanalit nak,
lo xngwnaa stub xaa, me chul doo nzhedizh,
25 nalet lu xgab yalchul cheen me ba leen lextoo lu,
nu nixa nalaat lu zen me lu tub tramp nel chul nlu garlo me.
26 Me nto cho nzho mod kiib nebse kwaan gaw lu,
per lee xngwnaa stub xaa nzho mod tira luux lu.
27 Nyent mod kiich xaa ki laz xaa,
telise zeeka xab xaa.
28 Nyent mod ze xaa lo ki nu nazekta nii xaa.
29 Sbaa nyent cho nzho mod gaa kwaan xngwnaa stub xaa telise ded xaa bid chelee xaa le xaaya.
30 Nanlet re xaa xgab nawent nak wann
cheleeya le wann xaa kwaan nkin gaw xaa.
31 per chelee xaa nguga xaa lo xaa
nkin zere xaaya tub gazh welt,
nkin zaa xaa rese kwaan nzhap xaa.
32 Per xaa kwaan nchaal xngwnaa stub xaa,
nyent yalnzhak yek xaa;
xaa kwaan nleya nluux xaa leeka lee xaa
33 Kwaan kayaa xaa nak golp nu yalnto,
nu tira nazheta.
34 Nel xaa selos nak mod ki
nu nayenlazht xaaya, zere xaaya lo xaa,
35 nakayaat xaa nik tub kwaan lo xaa kwaan mleya,
nixa zelazh xaa zyen kwaan lo xaa, nayenlazht xaaya.