Kanap lu lo me nto cho
5
Xgaan, kenzha yalnzhak cheen na,bin kwaan nii yalnzhak cheen na.
2 Snee zee kozhaw lu xkonsej na,
nu nebse yalnzhak nii lu.
3 Kwenta mzhin nak wdizh
kwaan nroo roo ngwnaa me nto cho,
nu lee xtizh me naguuzh doo nak,
kwenta nseyt.
4 Per nala doo xtizh me,
mod yix kwaan nala doo.
nu kwenta spad kwaan ndox rop ta.
5 Lee me nzhaze naz cheen yalgut,
lee me nzha naz roo baa.
6 Nanont naz cheen yalnaban lo me,
nanalit nak xnaz me, per nanzent meya.
7 Xgaan, wen kenzha nal,
nalaat lu kwaan seed na lu.
8 Bachii lo re ngwnaa, me nto cho,
nixa nazot lu gax garli me.
9 Zee naluuxt lu yalngezh cheen lu,
nu re liin kwaan nzhaal ban lu,
lo re me nawent nak.
10 Snee zee naluuxt re me zit jwers cheen lu,
zee nalaket xchinn lu garli me zit.
11 Snee, zee nagoont lu re mbizh gorna mer yet lu,
gorna nax lu lo yalyizh kwaan kalux lu.
12 Nu yé lu: "Chenoon namkayaat na konsej.
¡Chozhiin nambint na kwaan ngune xaa!
13 Nambint na kwaan ngunii xmaestr na,
nixa namkenzhat na kwaan ngunii xaa mseed na.
14 Lee nal nzho na lo yalzi,
lo dub yezh nu lo re xaa nkasa."
15 Gu nis kwaan nzho leen xpos lu,
nis kwaan nroo xlen cheen lu.
16 Naxot lu nis kwaan nroo xlen cheen lu,
nixa nasenot luya leen naz.
17 Naka cheen lu, nebse cheen lu,
nazaat luya go xaa nanlabeyyt lu.
18 Wen doo nak xlen cheen lu,
gok nix kwaan sa lu, me mka lu leezha mad lu.
19 Nak me kwenta mzhin, ma nkedoola xaa nu ma chul doo nlu.
Tubka gok nix lextoo lu gorna keezh me lu
nu tubka byakla lo yalnkela cheen me.
20 Xgaan, ¿Chozhiin ya lu lo re me nto cho?
¿Chozhiin keezh lu me nanlabeyyt lu?
21 Lee Xaa Tubka Nak ne xana kwaan nle myet,
lee xaa ne rese xnaz be.
22 Lee xaa nakap nyiga leeka lo kwaan nawent kwaan nle xaa,
nu leeka xjwalt xaa nkadoo xaa.
23 Yet xaa lo yalned cheen xaa,
nu lux xaa lo yalnachan cheen xaa.