Lee yalnzhak nak kwaan non
4
Xgaan, bin gu xtizh xuz gu,zaa gu yek gu gon guya, zee laya yek gu.
2 Na za konsej wen lo gu,
kwaanzee nayenlazht gu xtizh na.
3 Leezha win na, xuz na nu xnaa na mkedoola na.
4 Xuz na mseed na nu né xaa lo na:
"Kozhaw xtizh na leen lextoo lu,
kozhaw kwaan ngunabeyy na lu, zee ban lu.
5 Nayenlazht lu xtizh na nu nixa nabachit lu loya.
Kwaan yalnzhak nu kwaan zee yo yek lu.
6 Nalaat lu yalnzhak, leeya nak mod tub ngwnaa me kanap lu,
kela me nu lee me kanap lu.
7 Yalnzhak nak kwaan nkin yilotlaka, ¡kwaan lu me!
nu lo rese kwaan nkano lu ble zee yo yek lu.
8 Ble gro me zee lee me le gro lu,
chelee lu keezh lu me zee lee me le non lu.
9 Zob me tub kwaan chul nlu yek lu
nu zaa me tub koron kwaan chul lo lu."
10 Xgaan, kenzha xtizh na nu bin xtizh na,
zee ban lu xche doo.
11 Mlu na naz cheen yalnzhak lo lu ,
na mseed lu zee ze lu lo naz kwaan nali nak;
12 gorna ze lu nik tub kwaan nalet tras lo lu,
gorna rexonn lu nik tub kwaan naralt nii lu.
13 Kozhaw lu kwaan mseed na lu, nayenlazht luya,
kanapa nel leeya nak yalnaban cheen lu.
14 Nayat lu lo naz cheen re xaa nakap nak,
nixa nayat lu lo naz cheen re xaa naras.
15 Laa nadedt lu leen naz ba,
bachi baa nu laaya.
16 Re xaa nakap, chelee xaa nalet xaa kwaan nawent nalat mkaal lo xaa,
nxonn mkaal lo xaa chelee xaa nalet xaa ral nii stub xaa
17 Nel kwaan nawent nak mod kwaan nzhaw xaa,
nu lee re kwaan naras nak mod kwaan nzho xaa.
18 Lee naz cheen re xaa nali nak mod xni mbizh kwaan nla garziil,
nu cheepga nzeyak nyeraya axta nyilo nzhak rolta mbizh.
19 Per lee naz cheen re xaa nakap nak, nak mod yalnakaw,
nu nanet xaa cho kwaan ral nii xaa.
20 Xgaan kenzha xtizh na;
tubka bin re kwaan ni na lo lu.
21 Nayenlazht luya
tubka kozhawa lextoo lu.
22 Leeya nzaa yalnaban lo xaa nkwaana
nel leeya nak kwaan nsekwen xaa.
23 Kanap lextoo lu masra ke lo stub naz re kwaan,
nel leeya nle mban lu.
24 Laa nawdizht lu kwaan yalnkade,
tira laa lu nawdizht lu re wdizh nakap.
25 Nebse wii naz delant,
nu wii lo re kwaan nlu lo lu.
26 Ble xgab nen xana naz ze lu,
nu tubka nali ble xnaz lu.
27 Bachi lo re kwaan nawent,
nixa nayat lu naz lad li nixa nayat lu lad rebes.