Xomod kano xaa yalnzhak
3
Xgaan, nayenlazht lu xtizh na,nu naz leen lextoo lu kozhaw kwaan ngunabeyy na lu,
2 zee ban lu zyen doo liin,
nu kano lu yalnix.
3 Nalaat lu yalnkela nu kwaan wli,
blooya yenn lu kwenta bga zee nayenlazht luya,
nu tubka loya lextoo lu,
4 zee yakla Dios ne lu,
nu wen nii re xaa lu.
5 Wii lo Xaa Tubka Nak kwaan dub lextoo lu,
nu nawiit lu lo yalnzhak cheen lu.
6 Bselazh xaa lo rese kwaan nle lu,
nu lee xaa we lu lo naz nali.
7 Nawiit lu lo yalnzhak cheen lu,
mas wen zheb ne Xaa Tubka Nak,
nu bachi lo kwaan nawent.
8 Nel leeya gak kwaan le wen lu,
zee yo jwers zhit cheen lu.
9 Ble non Xaa Tubka Nak lo re kwaan nzhap lu,
nu lo re xle kwaan yilotlaka toop lu zaa lu lo xaa.
10 Snee, zee yizhe doo pa ngozhaw lu re xcheen lu,
nu yo kwal xis ub leen pa ngozhaw luya.
11 Xgaan, nzhaal gak non lo lu mod nseli Xaa Tubka Nak lu,
nu nixa nagakt nales lextoo lu gorna lee xaa galno lu,
12 nel lee Xaa Tubka Nak nseli re xaa nkela xaa,
modxa nle xaa xgann xaa, xaa nyakla xaa ne xaa.
13 Wen doo xaa nyizhal yalnzhak lo,
nu nyura yek xaa,
14 nel leeya nle xchinnra xaa lo plat,
nu grora kwaan nzaaya lo or.
15 Nonreya lo re ke kwaan chul nzhak,
nixa tub kwaan nzheklara xaa nyent mod gak lal kwaan leeya.
16 Lee yalnzhak nzaa gro doo yalnaban,
nu noka nzaaya re kwaan non nu wen kwib xtizh xaa.
17 Chul doo reke xaa tich naz cheena,
nu lo naz cheena nzho yalnix.
18 Lee yalnzhak nak kwenta yag cheen yalnaban lo re xaa nkwaana,
wen doo xaa nkayaaya.
19 Kwaan yalnzhak mdexkwaa Xaa Tubka Nak yizhyo,
nu kwaan yalnzhak mdexkwaa xaa yiba,
20 Kwaan yalnzhak ngok rol nistoo,
nu lee xkaw nzaa gop.
21 Xgaan, kozhaw lu ley nu gon lu diizh,
nu nalaat lu kwaane.
22 Nel leeya gak yalnaban lo lu,
nu chul luya kwenta bga kwaan yo yenn lu.
23 Zee wen ya lu xnaz lu,
nu naralt nii lu.
24 Gorna gaa lu nakanot lu yalnacheb,
sinka chul doo gaa lu.
25 Nazhebt lu ne lu re yalzi kwaan nded,
nixa re kwaan nakap kwaan nzhin lo re xaa nawent.
26 Nel Xaa Tubka Nak nzo lo lu,
nu nanlaat xaa la lu leen tramp.
27 Cheleeya nzho mod le lu tub kwaan wen,
bleya lo xaa nkina.
28 Nayét lu lo wechxinn lu:
"Zyaa zeeta bare lu, lee yee le na yud lu",
si nal nzho mod le lu yud xaa.
29 Nalet lu xgab le lu kwaan nawent lo wechxinn lu,
xaa wen nzho gax lo lu.
30 Nakwaant lu gaazh lu kwaan tich tub xaa,
cheleeya namlet xaa kwaan nawent lo lu.
31 Nagakt lu mbidyos ne lu re xaa nakap,
nixa nareket lu tich xnaz xaa.
32 Nel lee Xaa Tubka Nak nayii ne re xaa nakap,
per nyen xaa re xaa wen nak.
33 Lee Xaa Tubka Nak xobde garli re xaa nakap,
per lee garli re xaa wen, nii wen xaa.
34 Lee Xaa Tubka Nak xizhno re xaa nxizhno re xaa,
per nadoo nak xaa lo re xaa nadoo.
35 Lee re xaa nzhak, le non Xaa Tubka Nak xaa,
per lee re xaa ned le xaa zee ton re xaa.