Wen ze xaa lo yalnzhak
2
Xgaan, chelee lu kayaa lu xtizh na,nu kozhaw lu kwaan ngunabeyy na lu;
2 chelee lu kenzha lu yalnzhak,
nu le lu zee yo yek lu;
3 chelee lu naab lu zee yo yek lu,
nu naab lu yalnzhak;
4 chelee lu kwaan luya modxa nkwaan xaa plat,
nu mod re kwaan non kwaan nzholaan,
5 zee ne lu xomod zheb xaa ne xaa Xaa Tubka Nak,
nu yizhal yalnzhak cheen Dios lo lu.
6 Nel Xaa Tubka Nak nzaa yalnzhak;
nu roo xaa nroo yalnzhak nu xmod nzhaal yo myet.
7 Lee xaa nzaa yalnzhak lo re xaa nali nak,
nu nak xaa mod tub yiib kwaan nsaaw re xaa nzho tub mod nali.
8 Lee xaa nkanap naz cheen re xaa nali,
nu nkanap xaa naz kwaan nze re xaa nzhul.
9 Zee ne xaa nen cho kwaan nak kwaan wli nu kwaan nali,
nu kwaan lal le xaa nu ne xaa re naz wen;
10 zee lee yalnzhak la lextoo lu,
nu gak nix lextoo lu ne luya.
11 List gak lu zee kanap lu lu
nu lee yalnzhak kanap lu.
12 Zee kooya lu lo naz nawent,
nu lo re xaa kwaan nzhedizh re kwaan naxinn,
13 nu re xaa kwaan nlaa naz nali,
nu nze lo yalnakaw,
14 re xaa kwaan nzhak nix lextoo nle kwaan nawent
nu nyakla xaa nle xaa kwaan yizhyo;
15 narek nak naz kwaan nzha xaa,
nu nanalit nak xnaz xaa.
16 Lee yalnzhak kanap lu lo xngwnaa stub xaa,
nu lo re ngwnaa me reswelt doo nzhedizh,
17 me nlaa xmbyi, xaa mka me leezha mad me,
nu nyenlazh me kwaan myaan me gorna mchelya me delant lo Dios.
18 Kwaanzee lee xaa nreep garli me nzha lo yalgut;
nu naz cheen me nzhin lo pa nzho re xaa ngut.
19 Re xaa kwaan zeeb leen li me narootra xaa,
nixa nayizhaltra naz cheen yalnaban lo xaa.
20 Snee ze lu lo naz cheen re xaa wen,
nu ze lu lo naz cheen xaa nali nak;
21 nel re xaa nali nak yo lo yizhyo,
nu re xaa nali nak yo loya tira.
22 Per lee re xaa nawent koo xaa,
nu kiib xaa re xaa nakap lo yizhyo.