Rese kwaan mdexkwaa Xaa Tubka Nak nzhaal gool lo xaa
¡Gool be lo Xaa Tubka Nak!
148
Rese kwaan nzho leen yiba gool lo Xaa Tubka Nak;
rese xaa nzho naz ya lo yizhyo gool lo xaa.
2 Rese mandad cheen xaa gool lo xaa
nu rese xaa nzho leen yiba gool lo xaa.
3 Mbizh nu mbee nzhaal gool lo xaa
nu rese mbal,
ma nzaa xni,
nzhaal gool lo xaa.
4 Yiba nzhaal gool lo xaa
nu re xkaw kwaan nzho naz yiba nzhaal gool lo xaa.
5 Rese kwaane nzhaal gool lo xaa,
lo Xaa Tubka Nak,
nel lee xaa mzaa diizh zee mdexkwaa re kwaan.
6 Nu tira mle xaa zee nlakeya;
mlaa xaa ley zee naluxta.
7 Rese kwaan nzho lo yizhyo gool lo Xaa Tubka Nak;
rese waz,
nu re ma nzho leen nistoo;
8 bal ngwzi,
yuuke,
yeg,
nu mbi dox,
nzhaal gool lo xaa,
nel rese kwaane nzhon xtizh xaa.
9 Rese yi ndok nu rese yi chuut
nu rese yag chuut kwaan nzaa xle
nu rese yag sedr kwaan nzaa xkal nzhaal gool lo xaa.
10 Rese ma wen nu rese ma nxeen xaa,
rese ma nzelaz lo yo nu re myin,
ma nzebi nzhaal gool lo xaa.
11 Re rey yizhyo nu rese xaa re yezh,
re xaa non lo yizhyo nu re xaa nak xaa naab kwent nzhaal gool lo xaa.
12 Xaa mad nu re me mad,
xaa gol,
nu re mad win nzhaal gool lo xaa.
13 Gool be lo Xaa Tubka Nak,
nel gro doo nak xaa,
nel nebse le xaa gro doo nak,
lo yizhyo nu yiba.
14 Nu mleyy xaa tub xaa,
xaa nkano yalnabeyy,
kwent cheen re be
nu lo lee xaa nzhaal gool rese xaa nali nak,
re xinn Israel,
yezh kwaan nzo gax lo xaa.
¡Gool be lo Xaa Nabeyy!