Nzhaal gool xaa lo Dios
147
Gool be lo Xaa Tubka Nak.
Wen doo gool be salm lo Xtios be;
chul doo nak gool xaa lo xaa.
2 Xaa Tubka Nak,
ndexkwaa Jerusalén;
nu ntoop xaa re xaa Israel,
xaa mreech.
3 Lee xaa nsekwen re xaa nales nzhak
nu nsekwen xaa pa nweey.
4 Lee xaa nlab mbal,
ma nzob naz yiba,
nu rese ma nii le xaa.
5 ¡Gro doo nak Xaa Nabeyy lo be
nu gro doo nak yalnabeyy cheen xaa
nu nlabeyy xaa rese kwaan!
6 Lee Xaa Tubka Nak,
nle yud re xaa nadoo,
per nle nadoo xaa re xaa nakap.
7 Kwaan yalnix gool be lo Xaa Tubka Nak,
kwaan bagwel kwaan nkano chii yib gool be lo Xtios be.
8 Lee xaa nsaaw xkaw naz leen yiba,
nu nsela xaa yey lo yizhyo,
zee nle xaa nxen re yix yi kwaan nzeb yi.
9 Lee xaa nzaa kwaan nzhaw re ma,
nu axta lo re xinn nga gorna nlaan ma.
10 Nalet yalngezh cheen kabay gan gak nix xaa
nu nixa nalet yalngezh cheen myeta.
11 Lee Xaa Tubka Nak,
nyakla ne re xaa nzheb ne xaa,
nu re xaa ngwii lo gro yalnkela cheen xaa.
12 Jerusalén,
gool be lo Xaa Tubka Nak;
Jerusalén,
gool be lo Xtios be.
13 Lee xaa nye nsaaw roo bla cheen xkezh lu
nu nii wen xaa lo re xinn lu.
14 Le xaa zee yo wen lu yizhyo cheen lu
nu nzaa xaa kwaan wen nzhaw lu.
15 Lee xaa nxaal xtizh xaa lo yizhyo
nu lijer doo nzhina lo yizhyo.
16 Nzaa xaa yeg kwenta xiil,
nu nsela xaa gop kwenta xkade.
17 Nsela xaa yuuke kwenta ke chuut;
nu nsela xaa nal,
¿cho nzho mod ye loya?
18 Nxaal xaa xtizh xaa lo yeg,
zee nyala;
nxaal xaa mbi,
zee nxonn nis.
19 Mlu xaa xtizh xaa lo Kob
nu mlu xaa xley xaa lo Israel.
20 Nu nik stub lo yezh namlet xaa kwaane;
nyentra cho mlabeyy xley xaa.
¡Nzhaal gool be lo Xaa Tubka Nak!