Salm kwaan gool xaa lo Dios
Gool be lo Dios.
146
Gol na lo Xaa Tubka Nak.
2 Dubse mbizh mban na gol na lo Xaa Tubka Nak;
gol na salm lo Dios gorna mbanaka na.
3 Nawiit gu lo re xaa non,
nixa lo myet,
nel re xaa ba nyent mod koo be lo yalgut.
4 Nel gorna yet xaa bare xaa gak xaa yo stuba
nu mbizh ba lux rese kwaan nle xaa xgab le xaa.
5 Wen re xaa kwaan nle Dios cheen Kob yud,
xaa nkambaz Xaa Tubka Nak,
xaa nak Xtios xaa,
6 xaa kwaan mdexkwaa yiba nu yizhyo
nu nistoo nu rese kwaan nzho leena
nu tubka nle xaa kwaan nali.
7 Xaa Tubka Nak,
nle kwaan wli lo re xaa nales nzhak,
nzaa xaa kwaan nzhaw re xaa nlaan
nu nsela xaa re xaa nzho lozhyib.
8 Xaa Tubka Nak,
nle nyani garlo re xaa syeg;
Xaa Tubka Nak,
nle yud re xaa nales nzhak;
Xaa Tubka Nak,
nkela re xaa nali nak.
9 Xaa Tubka Nak,
nkanap re xaa nkanze
nu nkanap xaa re ngwzeb nu re ngwnaa byud,
per nluux xaa xnaz re xaa nakap.
10 Xaa Tubka Nak tubka nabeyy;
nak xaa Xtios xaa yezh Jerusalén
nu tira nabeyy xaa lo tub dii nu lo stub dii.
¡Gool be lo Xaa Tubka Nak!