Rese xaa nzhaal gool lo Dios
Salm kwaan mbill David lo Dios.
145
Xtios na gol na lo lu,
xaa nak rey cheen na,
tubka nii wen na lu.
2 Yizata mbizh nii wen na lu
nu tubka gol na lo lu.
3 Gro nak Xaa Tubka Nak,
nak xaa xaa nzhaal yizo kwaan gol na
nu gro doo nak xgab cheen xaa.
4 Tub dii yé lo stub dii re kwaan mle lu
nu zeet xaa re kwaan gro kwaan mle lu.
5 Zaa xaa kwent yalnabeyy cheen lu kwaan gro,
le na xgab re kwaan gro kwaan mle lu.
6 Zaa xaa kwent yalnabeyy cheen lu kwaan gro doo,
gro doo nak lu.
7 Nii xaa re kwaan wen kwaan nle lu
nu nye yé xaa:
“Nali nak lu.”
8 Wen nak Xaa Tubka Nak nu nkano xaa yalnles,
nen doo nayii xaa nu gro doo nak yalnkela cheen xaa.
9 Wen nak Xaa Tubka Nak lo re xaa
nu nlesla xaa ne xaa re kwaan mdexkwaa xaa.
10 Xaa Tubka Nak,
gool rese kwaan mdexkwaa lu lo lu
nu rese xaa nali nak nii wen lu.
11 Zeet xaa yalnix pa nabeyy lu
nu zeet xaa yalngezh cheen lu,
12 zee labeyy xaa re kwaan gro kwaan mle lu,
nu labeyy xaa yalngezh cheen lu kwaan gro doo,
kwaan nzho pa nabeyy lu.
13 Lee pa nabeyy lu nak yalnabeyy kwaan tira
nu tubka nak yalnabeyy cheen lu lo re dii.
Nali nak Xaa Tubka Nak lo xtizh xaa
nu kwaan yalnkela nle xaa re kwaan.
14 Lee Xaa Tubka Nak,
nzen re xaa nla lo yo
nu nlep xaa re xaa nales nzhak.
15 Rese xaa kambaz lu
nu nzaa lu kwaan nzhaw xaa gorna nkin xaaya.
16 Nxal lu lozhya lu
nu nzaa lu kwaan nzhaw rese xaa nu rese ma.
17 Nali nak Xaa Tubka Nak lo rese kwaan
nu kwaan yalnkela nle xaa rese kwaan.
18 Gax nzo Xaa Tubka Nak lo re xaa mbezh xaa,
re xaa kwaan wlipa mbezh xaa.
19 Nle xaa re kwaan nzhekla re xaa nzheb ne xaa;
nle xaa re kwaan nii xaa nu nle xaa yud xaa.
20 Lee Xaa Tubka Nak,
nkanap re xaa nkela xaa,
per luux xaa re xaa nakap nak.
21 Gol na lo Xaa Tubka Nak,
dubse yizhyo nii wen le xaa,
nel nambey nak xaa,
tira nu tubka.