Dios nak ke kwaan nsaaw na
Salm kwaan mkee David.
144
Wen doo nak Xaa Tubka Nak,
xaa nak ke kwaan nsaaw na,
xaa kwaan nseed na dil na,
zee le na gan lo dil.
2 Lee xaa nak Xtios na,
xaa nkano yalnkela;
lee xaa nkanap na
nu nak xaa kwenta yoo ndok kwaan nsaaw na;
nak xaa yalngezh cheen na;
lee xaa la na lo re xaa nayii ne na
nu nak xaa yiib kwaan nsaaw na
nu mzaa xaa re yezh nabeey na.
3 Xaa Tubka Nak,
¿cho nak myet zee nle lu xgab xaa?
¿Cho nak xinn re myet zee nkanap lu xaa?
4 Myet nak modxa ngob xaa tub mbi;
re mbizh cheen xaa nak modxa nded xkal.
5 Xaa Tubka Nak,
bxal yiba cheen lu nu bla;
bgal re yi nu ble roo zhena.
6 Bdich ngwzi,
zee reech re xaa nayii ne lu,
bkee wez yenn xaa,
zee xoon re xaa.
7 Blep yaa lu naz yat;
bloo na leen nistoo nech,
bloo na lo re xaa nangwiit lo lu.
8 Gorna nzhedizh xaa tubka nkade xaa;
nu ncheroo xaa kwaan yalnkade.
9 Dios,
lo lu gol na tub kant kub;
kwaan bagwel nu bagwel kwaan nkano chii yiib.
10 Lu nak xaa nle zee nle re rey gan lo dil;
lu mle yud David,
xaa nak xmos lu,
lo re spad cheen xaa nayii ne xaa.
11 Le yud na nu koo na,
bloo na lo re xaa nangwiit lo lu.
Gorna nzhedizh xaa tubka nkade xaa;
nu ncheroo xaa kwaan yalnkade.
12 Zee lee xgann nu xen leezha mad xaa,
xen xaa mod tub yag kwaan wen nkanap xaa;
xchaap nu gak chul,
gak me modxa nzhak yiso kwaan nzo skin yilaw.
13 Zee gak zyen xkalgon nu,
nu kano nu zyen doo kwaan gaw nu;
zee gak zyen re xmbakxiil nu,
chii mil ma kano nu.
14 Re xkoon nu gak ngezh ke gon;
wen kano ma xinn ma,
nixa nayot bi nales leen naz.
15 Wen re yezh kwaan nkano rese kwaane;
wen re yezh lee Xtios xaa nak Xaa Tubka Nak.