Nebse lo lu ngwii na
Salm kwaan mkee David.
143
Xaa Tubka Nak,
bin xtizh na;
kenzha gorna naab na lo lu.
Keb lo na,
nel wen nak lu nu nali nak lu.
2 Nanaabt lu kwent lo na,
xaa nak xmos lu,
nel nik tub xaa wen nyent.
3 Lee xaa nayii nrenal na;
ngobxex xaa na lo yizhyo.
Nle xaa jwers zee yoo na lo yalnakaw,
kwenta re xaa ngut nzhala mbizh.
4 Naguuzh doo nzhak na
nu nales doo nzhak lextoo na.
5 Mselazh na re mbizh yilo
nu mle na xgab xomod mle lu yud na
nu mle na xgab re kwaan mle lu.
6 Lo lu nlep na yaa na;
nkin na lu modxa nkin yizhyo bizh nis.
{Mbaz}
7 Xaa Tubka Nak,
le prad keb lo na,
nel nguguuzh doo na;
nakaxlaant lu lo na,
zee nagakt na kwenta xaa nla leen baa.
8 Yizata garziil blu yalnkela cheen lu lo na,
nel lo lu ngwii na.
Blu naz kwaan nzhaal zee na,
nel lo lu nza na yalnaban cheen na.
9 Xaa Tubka Nak,
bloo na lo re xaa nayii ne na,
nel lo lu nkwaan na pa kaxlaan na.
10 Seed na le na kwaan nzhekla lu,
nel lu nak Xtios na.
Le Mbi Naban cheen lu nzhe na
tub naz kwaan wen nak.
11 Xaa Tubka Nak,
kwaan le lu ble zee ban na,
nel nali nak lu,
bloo na lo yalnales.
12 Kwaan yalnkela cheen lu,
bluux re xaa nayii ne na,
luux lu re xaa nayii ne na,
nel na nak xmos lu.