Ngunaab xaa lo Xaa Tubka Nak zee saaw xaa xaa lo re xaa nayii ne xaa
Salm kwaan mkee David, nu mzaa xaaya lo xaa nabeyy lo re xaa nzholl.
140
Xaa Tubka Nak,
kanap na lo re xaa nakap;
kanap lu na lo re xaa naras,
2 xaa nle xgab le re kwaan nawent lo na,
xaa yizata mbizh nzhekla dil.
3 Roo xaa nak kwenta roo mball wiz;
nu re kwaan nzhedizh xaa nak kwenta xtox mball wiz.
{Mbaz}
4 Xaa Tubka Nak,
kanap lu na lo yalnabeyy cheen re xaa nakap nak;
kanap na lo re xaa naras,
re xaa nzhekla le zee ralnii na.
5 Re xaa nto yalxwa mzob tramp zen na;
mzob re xaa zyen doo yex zen xaa na;
nzob xaa tramp paro ndeed na.
{Mbaz}
6 Snee nii na lo lu,
Xaa Tubka Nak:
“Lu nak Xtios na;
bin xtizh na gorna naab na lesla lu ne lu na.
7 ¡Xaa Tubka Nak,
Xaa Nabeyy lu nkano yalnabeyy,
lu nak xaa nkanap na gorna dil na!”
8 Xaa Tubka Nak,
nagont lu re kwaan naab re xaa nakap lo lu;
nalet lu yud xaa lo xgab nawent cheen xaa,
zee natot xaa yalxwa.
{Mbaz}
9 Per lee re xaa nayii ne na,
leeka xjwalt xaa luux xaa.
10 ¡Bsela blan ki yek xaa!
¡Laa la xaa leen bal,
laa la xaa leen yeer pa nech,
paro nyent mod roo xaa!
11 Re xaa nii nawent nabant xaa lo yizhyo;
re xaa kwaan nle kwaan nakap,
lee re kwaan nawent renal xaa nu luuxa xaa.
12 Ne na lee Xaa Tubka Nak,
nkanap xaa prob;
nu nali nle xaa lo re xaa nales nzhak.
13 Telise zaa xaa nali dixkix lo lu;
nu xaa nle kwaan wen tubka yo xaa pa nzho lu.