Yalnzhak cheen Dios
Salm kwaan mkee David nu mzaa xaaya lo xaa nabeyy lo re xaa nzholl.
139
Xaa Tubka Nak,
lu mwii lo na
nu nlabeyy lu na.
2 Lu ne re kwaan nle na
nu cho gor nyixche na
nu nixa zit nzo na lo lu,
ne lu cho xgab nle na.
3 Ne lu paro nzha na nu paro mbaz na
nu nlabeyy lu re kwaan nle na.
4 Nixa zer nii na nik tub lan wdizh,
per lu,
Xaa Tubka Nak,
ne re kwaan nii na.
5 Rese lad lo na mlo lu welt
nu kwaan yaa lu msaaw lu na.
6 ¡Chul doo nak yalnzhak cheen lu lo na;
gro doo naka nu nanlata yek na!
7 Nexa pa ya na lee Mbi Naban cheen lu seetaka nzo kwaan na.
Nyent mod xonn na lo lu.
8 Chelee na yixoob na yiba,
baa nzo lu;
chelee na ya na leen baa,
noka baa nzo lu.
9 Chol zobi na pa nlen mbizh
nu yoo na stub ta nistoo,
10 nixa sbaaya lee yaa lu nzhano na
nu yaa lu lad li zen na.
11 Nu chelee na yé na:
“Kaxlaan na lo yalnakaw
nu lee xni yuuy lo na”;
12 nixa yaal nanat nakaw lo lu
nu lee yaal lal nak kwenta zhe lo lu.
Lal nak yalnakaw nu zhe lo lu.
13 Lu mdexkwaa na;
lu mdexkwaa na gorna nzhooka na lextoo xnaa na.
14 Nza na dixkix lo lu nel ndedyall na
nu ndedyall na ne na re kwaan mdexkwaa lu
nu ne wen na re kwaane.
15 Dubse na nlabeyy lu,
axta gorna mxen na naz leen lextoo xnaa na.
16 Mwii lu xomod mxen na
nu rese mbizh kwaan ban na mkee lu lo xkech lu
nu nik tuba nanyujwalt lo na.
17 ¡Dios,
chul doo nak xgab cheen lu lo na
nu gro doo naka!
18 Chelee na lab naya,
naka zyenra ke lo yux.
Gorna nguxche na,
seetaka zo na lo lu.
19 Dios,
wlipa chol gut lu re xaa nakap
nu chol bachi re xaa nawent lo na.
20 Re xaa ne nii nawent xaa lu
nu nle nanont xaa le lu.
21 Xaa Tubka Nak,
nayii na ne na re xaa nayii ne lu,
nu nankayaat na re xaa nroo lo xnaz lu.
22 Kwaan dub lextoo na nayii na ne na xaa
nu nle na xaa,
xaa nayii ne na.
23 Dios,
bwii lo na,
zee labeyy lu lextoo na;
le preb na zee labeyy lu re xgab cheen na.
24 Wii nen che nzha na naz nawent
nu be na lo naz nali kwaan tira nak.