Tira nak yalnkela cheen Xaa Tubka Nak
136
Zaa be dixkix lo Xaa Tubka Nak,
nel wen doo nak xaa,
nel tira nak yalnkela cheen xaa.
2 Zaa be dixkix lo Dios,
xaa nabeyy lo rese dios,
nel tira nak yalnkela cheen xaa.
3 Zaa be dixkix lo Xaa Nabeyy xaa nabeyy lo rese xaa nabeyy,
nel tira nak yalnkela cheen xaa.
4 Zaa be dixkix lo xaa nel nebse lee xaa nle kwaan gro,
nel tira nak yalnkela cheen xaa.
5 Zaa be dixkix lo xaa mdexkwaa yiba kwaan yalnzhak cheen xaa,
nel tira nak yalnkela cheen xaa.
6 Zaa be dixkix lo xaa mdexkwaa yizhyo leen nistoo,
nel tira nak yalnkela cheen xaa.
7 Zaa be dixkix lo xaa mdexkwaa xni naro,
nel tira nak yalnkela cheen xaa.
8 Zaa be dixkix lo xaa mle zee nzaa mbizh xni zhe,
nel tira nak yalnkela cheen xaa.
9 Zaa be dixkix lo xaa mle zee nzaa mbee nu mbal yiba xni nzhal yaal,
nel tira nak yalnkela cheen xaa.
10 Zaa be dixkix lo xaa mbit re xgann xaa Egipto,
xaa yilotlaka lo xaa,
nel tira nak yalnkela cheen xaa
11 Zaa be dixkix lo xaa mloo re xey be xaa Israel Egipto,
nel tira nak yalnkela cheen xaa.
12 Mle xaaya kwaan yalngezh cheen xaa,
nel tira nak yalnkela cheen xaa.
13 Zaa be dixkix lo xaa,
nel mle rol xaa Nistoo Naxne,
nel tira nak yalnkela cheen xaa.
14 Nu mted xaa re xey be xaa Israel loya,
nel tira nak yalnkela cheen xaa.
15 Per lee Faraón nu re xsoldad xaa mlaw leen Nistoo Naxne,
nel tira nak yalnkela cheen xaa.
16 Zaa be dixkix lo xaa mlu naz lo re xaa naz wen yizhyo bizh,
nel tira nak yalnkela cheen xaa.
17 Zaa be dixkix lo xaa mluux re rey,
nel tira nak yalnkela cheen xaa.
18 Nu mbit xaa re rey xaa nkano yalnabeyy,
nel tira nak yalnkela cheen xaa.
19 Mbit xaa rey Sehón,
xaa nabeyy lo re xaa Aram,
nel tira nak yalnkela cheen xaa.
20 Mbit xaa rey Og,
xaa nabeyy lo re xaa Basán,
nel tira nak yalnkela cheen xaa.
21 Nu mzaa xaa xkizhyo xaa lo re xey be mod tub kwaan laa xuz xaa lo xgann xaa,
nel tira nak yalnkela cheen xaa.
22 Nu mlaa xaaya lo re be,
xaa Israel xaa nak xmos xaa,
nel tira nak yalnkela cheen xaa.
23 Zaa be dixkix lo Dios,
xaa mselazh re be leezha nales ngok be,
nel tira nak yalnkela cheen xaa.
24 Zaa be dixkix lo Dios nel mloo xaa be lo re xaa nayii ne be,
nel tira nak yalnkela cheen xaa.
25 Zaa be dixkix lo xaa nzaa kwaan nzhaw be nu kwaan nzhaw re ma,
nel tira nak yalnkela cheen xaa.
26 Zaa be dixkix lo Dios,
xaa nabeyy naz leen yiba,
nel tira nak yalnkela cheen xaa.