Re kwaan gro cheen Xaa Tubka Nak
Gool be lo Xaa Tubka Nak.
135
¡Bill gu lo Xaa Tubka Nak!
¡Bill gu lo Xaa Tubka Nak!
xaa nak xmos xaa,
2 gu,
xaa nzho roo li Xaa Tubka Nak,
xaa nzho naz lach jwer li Xtios be.
3 Gool be lo Xaa Tubka Nak,
nel wen nak xaa;
gool be salm lo xaa,
nel chul nak xaa.
4 Lee Xaa Tubka Nak mleey Kob,
zee gak re xaa Israel xaa xaa.
5 Na ne wen,
gro doo nak Xaa Tubka Nak,
lee Xaa Nabeyy grora nak xaa lo re dios.
6 Lee Xaa Tubka Nak,
nle loka kwaan nzhekla xaa,
naz leen yiba nu lo yizhyo,
naz leen nistoo nu pa mas nech.
7 Nlep xaa xkaw lo yizhyo,
nxaal xaa balngwzi zee nla yey
nu ngoo xaa mbi paro nzhoya.
8 Lee xaa mle zee ngut re xaa yilotlaka lo re xaa Egipto,
re xaa nu axta re ma.
9 Mle xaa kwaan gro lo re xaa Egipto,
lo xaa ngok faraón nu lo xaa nke zhiin lo xaa.
10 Mluux xaa zyen doo yezh,
mbit xaa re rey xaa non doo:
11 Sehón,
rey cheen xaa Hesbón,
Og,
rey cheen xaa Basán,
nu rese rey cheen xaa Canaán.
12 Lee yizhyo cheen re rey mzaa xaa lo Israel,
mzaa xaaya lo re xaa xaa,
zee gaka xcheen xaa.
13 Xaa Tubka Nak,
tira nak le lu;
Xaa Tubka Nak,
tubka nzeet xaa lu.
14 Xaa Tubka Nak,
naab kwent lo yezh cheen xaa
nu nlesla xaa ne xaa,
xaa nak xmos xaa.
15 Per lee xtios re xaa re yezh nak or nu plat,
kwaan ndexkwaa yaa xaa.
16 Nzob rooya,
per nagarlot niiya;
nzob garloya,
per nangwiita;
17 nzob nzhaya,
per nanzhonta kwaan,
nixa nangobta mbi.
18 Lal nak maj kwaan re xaa mdexkwaaya
nu noka re xaa kwaan ngwii loya nak lal mod xmaj xaa.
19 Rese dii cheen Israel,
¡nii wen gu Xaa Tubka Nak!
Rese dii cheen Aarón,
¡nii wen gu Xaa Tubka Nak!
20 Rese dii cheen Leví,
¡nii wen gu,
Xaa Tubka Nak!
gu xaa nkela Xaa Tubka Nak,
nii wen gu xaa.
21 Axta Jerusalén nii wen xaa Xaa Tubka Nak,
xaa nzho Jerusalén.
¡Gool be lo Xaa Tubka Nak!