Dios nu re maj
115
Xaa Tubka Nak,
naleet lo nu gool xaa,
naleet lo nu sinka lo lu nzhaal gool xaa,
nel nkela lu myet nu nali nak lu.
2 ¿Chozhiin mbezh re xaa re yezh:
“¿Ma Xtios gu nal?”
3 Lee Xtios be nzob naz leen yiba
nu nle xaa rese kwaan nzhekla xaa.
4 Per lee xtios re xaa nak or nu plat,
kwaan ndexkwaa yaa xaa.
5 Nzob rooya,
per nagarlot niiya;
nzob garloya,
per nangwiita,
6 nzob nzhaya,
per nanzhonta kwaan;
nzob xiiya,
per nangobta mbi
7 nzob yaaya,
per nanzenta kwaan;
nzob niiya,
per nanzeta;
nzob yenna,
per nagarlot niiya.
8 Lal nak maj kwaan xaa mdexkwaaya
nu noka re xaa kwaan ngwii loya nak lal mod xmaj xaa.
9 Re be,
xaa Israel,
wii be lo Xaa Tubka Nak;
nel lee xaa nak xaa nle yud be,
nu lee xaa nak kwenta tub lee yiib kwaan nsaaw be.
10 Re xaa li Aarón,
wii gu lo Xaa Tubka Nak;
nel lee xaa nak xaa nle yud gu,
nu lee xaa nak kwenta tub lee yiib kwaan nsaaw gu.
11 Re be xaa kwaan nzheb ne Xaa Tubka Nak,
wii be lo xaa;
nel lee xaa nak xaa nle yud be
nu lee xaa nak kwenta tub lee yiib kwaan nsaaw be.
12 Xaa Tubka Nak,
nselazh be nu nii wen xaa lo be.
Nii wen xaa li Israel nu nii wen xaa li Aarón.
13 Xaa Tubka Nak nii wen xaa re xaa nzheb ne xaa,
nii wen xaa re xaa nanont nu re xaa non.
14 Lee Xaa Tubka Nak,
zaa zyen xinn gu lo gu
nu le xaa zee kano gu zyen dii cheen gu.
15 Xaa Tubka Nak,
nii wen gu,
xaa mdexkwaa yiba nu yizhyo.
16 Xaa Tubka Nak,
nabeyy yiba,
nu mzaa xaa yizhyo lo re xaa.
17 Re xaa ngut nagoolt lo Xaa Tubka Nak
nixa re xaa mla leen baa.
18 Be nak xaa gool lo Xaa Tubka Nak,
gool be lo xaa nal nu tubka.
¡Gool be lo Xaa Tubka Nak!