Mloo xaa xaa lo yalgut
116
Nkela na Xaa Tubka Nak,
nel mbin xaa xtizh na nu re kwaan ngunii na lo xaa.
2 Nel mkenzha xaa re kwaan ngunii na,
kwaanzee rese mbizh ban na nii na lo xaa.
3 Ngulo mchaal yalne cheen yalgut na,
nguzhal na lo yalnales paro nyu re xaa nzhet;
yalnales nu yalne nguzhal na.
4 Kwaanzee mzeet na le Xaa Tubka Nak:
“¡Naab na lo lu,
Xaa Tubka Nak,
le lu yud na!”
5 Xaa Tubka Nak,
wen nak xaa nu nali nak xaa;
nlesla Xtios be ne be.
6 Xaa Tubka Nak nkanap xaa nadoo nak;
leezha namkanotra na jwers lee xaa mle yud na.
7 ¡Nalsi wen na,
nel Xaa Tubka Nak mle wen lo na!
8 Nel lu mloo na lo yalgut,
mle lu zee nanzhontra na
nu mle lu zee nanruzhtra nii na.
9 Kwaanzee tubka zee na kwaan Xaa Tubka Nak,
lo yizhyo pa nzho re xaa mban.
10 Nixa nales doo nzhak na,
per tubka ngwii na lo Dios.
11 Nu lo yalne cheen na ngunii na:
“Rese xaa nak xaa nkade.”
12 ¿Cho kwaan kix na lo Xaa Tubka Nak,
lo re kwaan wen kwaan mle xaa lo na?
13 Za na tub gon cheen xis ub nel mle xaa yud na
nu zeet na le Xaa Tubka Nak.
14 Nal le na kwaan myaan na lo Xaa Tubka Nak,
lo yezh cheen xaa.
15 Nales doo nzhak Xaa Tubka Nak,
gorna nzhet tub xaa nali nak lo xaa.
16 Xaa Tubka Nak,
wlipa na nak xmos lu,
xmos lu nak na,
nu nak na xinn me nke zhiin lo lu.
Lu mloo na lo re kwaan nawent.
17 Za na gon nu kwaan gol na lo lu,
zeet na le Xaa Tubka Nak.
18 Le na kwaan myaan na lo Xaa Tubka Nak,
lo re yezh cheen xaa,
19 lo lach cheen li Xaa Tubka Nak,
mer leen yezh Jerusalén.
¡Gool be lo Xaa Tubka Nak!