Yalnabeyy cheen Xaa Tubka Nak
97
¡Xaa Tubka Nak,
nak rey!
¡Rese be xaa yizhyo,
gak nix lextoo be!
¡Nu rese gu,
xaa yezh kwaan nzhikwaa roo nistoo,
gak nix lextoo gu!
2 Nzho xaa leen xkaw yaas;
nali nu wli nak pa nzob xaa nabeyy xaa.
3 Tub bal nzhaner lo xaa,
zee zeeka re xaa nayii ne xaa,
xaa kwaan nzo lo xaa.
4 Nu lee bal ngwzi cheen xaa mzaa xni dubse yizhyo;
lee gorna ngune yizhyo lo xni,
zee mzheba.
5 Delant lo Xaa Tubka Nak,
nyall re yi modxa nyall ser,
delant lo Xaa Nabeyy,
xaa nabeyy lo dubse yizhyo.
6 Lee re kwaan nzho yiba nzaa kwent nali nak xaa
nu rese yezh ngwii lo xni chul cheen xaa.
7 Ton rese xaa ngwii lo maj,
re xaa kwaan nto yalxwa lo dios yag,
kichxub rese dios lo Xaa Tubka Nak.
8 Xaa Tubka Nak,
gorna gon re xaa Jerusalén kwaane,
gak nix lextoo xaa
nu noka gak nix lextoo re xaa yezh cheen Judá,
gorna naab lu kwent.
9 Nel lu,
Xaa Tubka Nak,
Xaa Nzob Naz Yiba,
nu nonra lu lo rese kwaan nak mod dios
nu nonra lu lo dubse yizhyo.
10 Re xaa nkela Xaa Tubka Nak,
nayii xaa ne xaa kwaan nawent
nu lee xaa nkanap re xaa xaa,
xaa nali nak
nu ngoo xaa xaa lo re xaa nakap.
11 Nlu xaa xni cheen xaa lo re xaa wen nak
nu lee yalnix nak cheen xaa nali nak.
12 Gu,
xaa nali nak,
gok nix gu lo Xaa Tubka Nak,
bill gu lo xaa nzhul nak.