Kant kwaan nzhaal gool be
(1 Cr 16:23-33)
96
Lo Xaa Tubka Nak,
gool be kant kub.
Gool rese myet yizhyo lo Xaa Tubka Nak.
2 Gool be lo Xaa Tubka Nak,
nu zeet be le xaa yizata mbizh.
Zaa be kwent lo re xaa nel lee Xaa Tubka Nak,
nzaa yalnaban cheen be.
3 Wdizh be re kwaan non cheen xaa lo re yezh,
zaa be kwent re kwaan gro kwaan mle xaa lo rese myet.
4 Lee Xaa Tubka Nak,
naro nak xaa nu nzhaal gool be lo xaa
nu nzhaal zheb be ne be Dios ke lo stub naz dios.
5 Nel maj nak dios cheen re yezh;
per lee Xaa Tubka Nak mdexkwaa yiba.
6 Nzho gro xni pa nzho xaa;
nzho yalnabeyy nu kwaan chul leen xkyidoo xaa.
7 Rese be nu re sawlizh be,
xaa nzho dubse yizhyo,
yé be wen nak Xaa Tubka Nak
yé be non doo yalchul cheen Xaa Tubka Nak.
8 Le non be lo Xaa Tubka Nak;
wee re be gon nu ya be garli xaa.
9 Nu kichxub be lo Xaa Tubka Nak xaa nzhul nu xaa nambey nak.
¡Zheb rese xaa dubse yizhyo ne xaa!
10 Yé be lo re xaa yezh dubse yizhyo:
“¡Lee Xaa Tubka Nak nak rey!”
Nu lee xaa mdexkwaa yizhyo zee nangunta;
nu lal naab xaa kwent lo xaa rese yezh.
11 ¡Gak nix yiba nu yizhyo
nu kwezh re nis kwaan nzho leen nistoo!
12 ¡Yakla wen nu re kwaan nzho wen;
zee lee re yag kwaan nzeb naz wen yo gan lextoo!
13 Re kwaane gool lo Xaa Tubka Nak nel yaad xaa lo xkizhyo xaa;
yaad xaa zee naab xaa kwent lo rese myet.
Lal naab xaa kwent lo xaa nzho reta yezh tub mod nali.