Kant kwaan nzhaal gool be lo Xaa Tubka Nak
95
¡Te gu,
gool be kwaan yalnix lo Xaa Tubka Nak!
¡Kwaan yalnix gool be lo xaa nak mod ke,
xaa mloo be lo yalgut!
2 Nzhaal zhaal be,
zee zaa be dixkix lo xaa
nu gool be lo xaa.
3 Nel Xaa Tubka Nak,
nak Dios xaa ngezh doo,
lee xaa nak Rey,
xaa nabeyy lo rese dios.
4 Lozhya xaa nzho dubse yizhyo
nu cheen xaa nak re yi naro.
5 Lee nistoo nak xcheen xaa nel lee xaa mdexkwaaya
nu kwaan yaa xaa mdexkwaa xaa yizhyo.
6 Te gu,
zee kichyek be axta lo yo nu gool be lo xaa
nu kichxub be lo Xaa Tubka Nak,
xaa mdexkwaa be;
7 nel lee xaa nak Xtios be
nu lee be nak yezh cheen xaa
nu mbakxiil ma nzho lozhya xaa.
Cheleeya nalzhe kayon gu kwaan né Dios:
8 “Nalenedt gu lextoo gu modxa mle re xey gu xaa yilo,
pa le Meriba,
leezha mzo xaa naz wen yizhyo bizh,
pa noka le Masaha.
9 Naz ba mle re xey gu preb na,
nixa mwii xaa lo re kwaan gro kwaan mle na.
10 Choo liin ngunayii na ne na re xey gu,
zee nzhé na lo xaa:
‘Tubka nle ned gu lextoo gu,
kwaanzee namlabeyyt gu xnaz na.’
11 Kwaanzee lo yalnayii cheen na mcheroo na,
wlipa na tira nyent mod zeeb xaa pa mdexkwaa na le xaa deskans.”