Xaa Nabeyy nak xaa naab kwent lo yizhyo
94
Dios,
Xaa Tubka Nak,
xaa naab kwent,
Dios,
xaa naab kwent lo re myet,
blu lo re xaa.
2 Lu nak xaa naab kwent lo re xaa yizhyo;
bzaa kwaan yizo re xaa nto yalxwa.
3 Xaa Tubka Nak,
¿axta cho gor gak nix re xaa nakap?,
¿axta cho gor nyakla xaa?
4 Rese xaa nakap nii nawent,
¿axta cho gor laa xaa natot xaa yalxwa?
5 Xaa Tubka Nak,
re xaa ne nzhekla luux yezh cheen lu
nu tezi xaa re xaa nak dii cheen lu.
6 Nzhut xaa re me techo nu re xaa nkanze
nu nzhut xaa re ngwzeb.
7 Nu mbezh xaa:
“Nangwiit Xaa Tubka Nak loya,
nanet Dios cheen Kob kwaan nle be.”
8 Xaa ned,
bin gu kwaane,
¿xaa nachan axta cho gor la kwaane yek gu?
9 ¿Chenel nagont xaa mzob nzha re be?
¿Chenel nyent mod wii xaa mdexkwaa garlo re be?
10 Dios,
xaa ntezi rese yezh,
¿chenel nachezit xaa re be?
¿chenel Dios xaa nseed myet nzho jwalt yalnzhak lo?
11 Xaa Tubka Nak,
nlabeyy re xgab cheen re myet,
ne xaa lee xgab cheen re xaa nanont.
12 Xaa Tubka Nak,
wen re xaa kwaan nseli lu
nu kwaan ley cheen lu nseed lu xaa
13 nu wen ded re xaa gorna zhin yalzi lo xaa,
bintra lee yeer cheen re xaa nakap yilo yeen.
14 Lee Xaa Tubka Nak,
nachoblat yezh cheen;
tubka nkanap xaa xtii xaa.
15 Lee xaa naab kwent bare naab kwent nali
nu lee re xaa wen reke tich re kwaan nali.
16 ¿Cho xaa la na lo xaa nakap?
¿Cho mroo xjabor na lo re xaa nle kwaan nawent?
17 Chol Xaa Tubka Nak nanglet yud na,
nzhoola na lo re xaa ngut.
18 Leezha nzhé na mruzh nii na,
lu,
Xaa Tubka Nak,
mlu lu yalnkela cheen lu lo na nu mkanap lu na.
19 Leezha nzhayak zyenra kwaan nawent lo na,
lu mseleyy na nu mzaa lu yalnix lo na.
20 Nyent mod zo re xaa naab kwent nanalit kwaan lu,
xaa nle kwaan nawent kwaan ley.
21 Ngaazh xaa kwaan tich xaa wen nak,
nu nxaal xaa xaa zee nzhut xaa xaa nali nak.
22 Per lee Xaa Tubka Nak,
nak xaa nkanap na,
Xtios na nak ke kwaan ngwii na lo.
23 Lee xaa le zee kix xaa re kwaan mle xaa
nu luux xaa re xaa,
lo re kwaan nawent kwaan mle xaa;
lee Xtios be,
Xaa Tubka Nak,
tira luux re xaa.