Xaa Tubka Nak nak xaa nkanap be
91
Xaa nzho xan xiil Xaa nzob naz Yiba,
yo xaa xan xiil Xaa Nkano Dubse Yalnabeyy.
2 Yé na lo Xaa Tubka Nak:
“Lu nak xaa nsaaw na,
lu nak mod yoo ndok kwaan nsaaw na,
lu nak Xtios na,
xaa ngwii na lo.”
3 Nebse lee xaa nzho mod koo lu lo re tramp kwaan nzob xaa xlaan
nu lo re yalyizh kwaan nluux xaa.
4 Kwaan xtoob xaa saaw xaa lu
nu xan xiil xaa kozhaw xaa lu
nu lee kwaan wli cheen xaa gak mod tub lee yiib kwaan saaw lu.
5 Nazhebt lu ne lu re kwaan nakap kwaan nzho yaal,
nixa re kwaan nkee wez kwaan nkee xaa yenn be,
6 Nixa re yalyizh kwaan nawent nzebech kwaan kanze yaal,
nu nixa re kwaan luux xaa zhe.
7 Nel lad beg cheen lu yet tub mil xaa,
nu lee lad li cheen lu yet chii mil xaa,
per lee lu nyent cho kwaan gak.
8 Wlipa,
kwaan garlo lu wii lu,
cho kwaan kayaa re xaa nakap nak.
9 Nel ngwii lu lo Xaa Tubka Nak,
xaa nsaaw na,
Xaa Nzob Naz Yiba,
nak xaa nkanap lu
10 nu nazhint kwaan nawent lo lu,
nixa nazhint yalzi garli lu,
11 nel xaal xaa xmandad xaa lo lu,
zee kanap xaa lu naz nzha lu.
12 Kwaan yaa xaa wee xaa lu,
zee nalat nii lu lo ke.
13 Taazh lu tich mbezh nu tich mball wiz
nu taazh lu tich mbezh yeen nu tich re mball.
14 Na ko xaa lo kwaan nawent,
nel mwii xaa lo na,
nu kanap na xaa,
nel nlabeyy xaa na.
15 Lee gorna nii xaa lo na,
zee keb na lo xaa;
zo na kwaan lee xaa gorna nales nzhak xaa;
ko na xaa nu le non na xaa.
16 Za na zyen doo liin ban xaa,
nu lu na yalnaban cheen na lo xaa.