Tub kant kwaan gool xaa lo Dios
Salm kwaan nzholl xaa zhe sab.
92
Xaa Tubka Nak,
wen doo gool xaa lo lu
nu gool xaa salm lo lu,
Xaa Nzob Naz Yiba;
2 Garziil gol na lo lu nel nkela lu na
nu lee yaal gol na lo lu nel nali nak lu,
3 Gol na kwaan bagwel kwaan nkano chiibchop yib
nu bagwel kwaan nkano chii yib,
4 Lu,
Xaa Tubka Nak,
nix doo nzhak lextoo na lo re kwaan gro kwaan mle lu,
kwaanzee nix doo nzhak lextoo na ne na re kwaan mdexkwaa lu kwaan yaa lu.
5 Xaa Tubka Nak,
¡aka gro nak re kwaan mle lu!
¡Gro doo nak xgab cheen lu!
6 Lee re xaa ned naneta,
nu lee re xaa nachan nanlat kwaane yek:
7 Nixa xen re xaa nakap mod yixwen
nu mod yeey nyaal rese xaa nawent nak
nu tira lux xaa.
8 Lu,
Xaa Tubka Nak,
Xaa Nzob Naz Yiba,
tira nabeyy lu naz leen yiba.
9 Xaa Tubka Nak,
nee nzo xaa nayii ne lu
nu wlipa lux re xaa nayii ne lu;
rese xaa nle kwaan nawent reech xaa rese pa.
10 Per lee lu zaa yalngezh lo na modxa ngezh ngoon wen;
mchuun lu nseyt kwaan wen yek na.
11 Wii na xomod luux lu re xaa nayii ne na;
gorna gon na yiyo re xaa nakap.
12 Mod yag yin xen re xaa nali nak
nu nxen xaa mod yag sedr kwaan nzho Líbano.
13 Nzoya garli Xaa Tubka Nak
nu chul nzaaya yeey garli Dios.
14 Zyen doo liin bana nu seetaka zaaya xle;
tubka wen xaa nu ngezh xaa.
15 Zee yé xaa,
lee Xaa Tubka Nak nali nak;
lee xaa nak mod tub ke kwaan nsaaw na
nu nali nak xaa.