Yech tap
(Salm 90-106)
Tira nak Dios per lee myet cheepse mban
Kwaan ngunii Ches lo Dios, xaa nak xaa Dios.
90
Xaa Nabeyy,
lu nak pa nkaxlaan nu,
lo tub dii nu lo stub dii.
2 Gorna zeraka yo re yi
nu gorna zeraka dexkwaa yizhyo,
axta yilo nu axta gwluzh,
lu nak Dios.
3 Lu nle zee lee re myet gak yide stuba,
gorna mbezh lu:
“¡Bare myet gak yide stuba!”a
4 Tub mil liin nzak lu nak tub mbizh,
nak mod naaze kwaan mdedla,
nak mod lakse gor yaal.
5 Nzhe lu myet mod tub yuu kwaan nzho nal nis;
nebse nak nu mod tub mkaal.
Nu nak nu mod yixwen kwaan nxen garziil;
6 garziil nxena nu zaaya yeey,
lee mzhel yizhyo ngoola nu nluxa.
7 Wlipa yalnayii cheen lu nak kwaan nluux nu
nu kwaan xyan cheen lu ncheb lu nu.
8 Mbe lu re xjwalt nu
nu ne lu re xjwalt nu kwaan nzholaan.
9 Wlipa rese mbizh kwaan mban nu
nzho nu xan yalnayii cheen lu;
lee re liin kwaan mban nu
nak modxa ngob xaa tub mbi.
10 Re mbizh kwaan nzhaal ban nu nak chongal nzho chii liin;
chelee nu nkano nu jwers ban nu tap gal liin,
Per lo reya ded doo re nu bid
nu liger doo nded re liin cheen nu nu nzhet nu.
11 ¿Cho nzho mod labeyy yalnabeyy cheen yalnayii cheen lu?
lee yalnayii cheen lu nak kwaan nzhaal zheb xaa ne xaa,
12 Bseed nu xomod ban nu lo yizhyo,
zee kano nu yalnzhak.
13 ¿Xaa Tubka Nak,
axta cho gor le lu yud nu?
¡Bkano yalnles lo nu,
xaa nak xmos lu!
14 Garziil blu yalnkela cheen lu lo nu,
nu rese mbizh kwaan mban nu gool nu lo lu kwaan yalnix.
15 Ble nix lextoo nu,
mod re mbizh kwaan mted lu nu bid,
nu mod re liin kwaan mded nu bid.
16 Ble zee wii nu,
xaa nak xmos lu,
lo re kwaan kale lu
nu re xtii nu wii lo xni chul cheen lu.
17 Naab na zee lee yalnkela cheen lu,
xaa nak Xtios nu,
Xaa Nabeyy,
zo lo nu,
Ble yud nu lo zhiin kwaan nle nu kwaan yaa nu;
aja,
wen ble yud nu lo zhiin kwaan nle nu kwaan yaa nu.