Dios myaan kwaan David
Maskila cheen Etán xgann Zera.
89
Xaa Tubka Nak,
tubka gol na lo lu,
nel gro doo nak yalnkela cheen lu
nu tubka yé na,
lee lu nali nak
lo tub dii nu lo stub dii.
2 Yé na lee yalnkela cheen lu tubka nzho
nu lee yalnali cheen lu tubka ndii,
modxa tubka nzho yiba.
3 Nu nzhé lu:
“Myaan na kwaan xaa mleyy na;
mcheroo na lo David,
xaa nak xmos na.
4 Le na lo re xtii lu,
zee tubka nabeyy xaa xlugar lu.”
{Mbaz}
5 Xaa Tubka Nak,
lee re xmandad lu xaa yiba gool lo lu
nu kwent cheen mod nali nak lu lo re xaa lu,
xaa nzhul.
6 Xaa Tubka Nak,
xaa nzho naz yiba,
¿Cho xaa gak lal kwaan lu?
Nyentra cho nak kwenta lu,
lo re xmandad lu.
7 Gro doo nak lu Dios,
paro nkasa re xaa nzhul nak
nu grora nak lu lo re mandad cheen lu,
xaa nzho lo lu.
8 Xaa Tubka Nak,
Dios,
Xaa Nkano Dubse Yalnabeyy,
¿cho nak kwenta lu?,
nel tubka nali nak lu.
9 Lu nkano yalnabeyy lo nistoo kwaan nakap nzhak
nu lu zheta nle nistoo gorna nakap nzhaka.
10 Lu mtaazh yek Rahabb kwenta tub ma ngut,
kwaan yalngezh cheen lu,
mcheech chii lu re xaa nayii ne lu.
11 Cheen lu nak yiba nu cheen lu nak yizhyo
nu rese kwaan nzho leena nel lu mdexkwaaya.
12 Lu mdexkwaa naz ta ya nu naz ta yat
nu kwaan yalnix nzholl rop yi cheen Tabor nu yi cheen Hermón lo lu.
13 Kwaan yaa lu nzho mod le lu zyen doo kwaan gro
nu gro doo nak yalnabeyy cheen lu.
14 Kwaan wli nu kwaan nali nzho pa nabeyy lu;
yalnkela nu kwaan wli nroo yilotlaka pa nzho lu.
15 Xaa Tubka Nak,
wen re yezh nzholl lo lu
nu nze xaa kwaan yalnix lo xni cheen lu.
16 Dubse zhe nzhak nix xaa lo lu,
nu nix nzhak lextoo xaa lo xcheen lu kwaan wli.
17 Nel lu nak yalnix cheen xaa nu yalngezh cheen xaa;
nu nel wen nak lu,
zee nzaa lu yalngezh lo nu.
18 Xaa Tubka Nak,
lu nak kwenta tub lee yiib kwaan nsaaw nu,
lu nak rey cheen nu,
nak lu xaa Nambey lo Israel.
19 Ngu tub welt ngunii lu kwaan mlu lo lu
nu nzhé lu lo yezh cheen lu,
xaa nali nak:
Mleey na tub xaa nanzhebt lo yezh cheen na
nu mleey na tub xaa lo re xaa yezh.
20 Nguzhal na David,
xaa nak xmos na,
xaa mchub na nseyt yek,
xaa mleyy na,
zee gak xaa rey.
21 Tubka zo na kwaan lee xaa,
nu za na yalngezh lo xaa.
22 Lee re xaa nayii nakeeta yek xaa,
nixa nalet re xaa nakap gan lo xaa.
23 Na tazh yek re xaa nayii ne xaa,
nu seweey na re xaa nii nawent xaa.
24 Lee yalnkela cheen na nu kwaan wli zo kwaan lee xaa
nu kwaan le na,
gak non yalngezh cheen xaa.
25 Za na yalnabeyy lo xaa,
zee nabeyy xaa lo nistoo,
nu nabeyy xaa lo re yuu.
26 Nu lee xaa né lo na:
“Lu nak xuz na,
Xtios na,
nu nak lu mod tub ke pa yizhal na yalnaban cheen na”.
27 Na za kwaan nyalzo xaa yilotlaka,
zee nabeyy xaa lo re rey yizhyo.
28 Tubka nkela na xaa
nu kozhaw na kwaan myaan na,
nali zo na lo xaa.
29 Nu lee dii cheen xaa tira nabeyy xlugar xaa
nu lee pa nabeyy xaa,
dii mod mbizh naz leen yiba.
30 Chelee re xinn xaa laa xley na
nu nalet xaa mod nzhéya,
31 Chelee xaa nalet xaaya
nu nakozhawt xaa xley na,
32 zeesi lee na tezi xaa kwaan baston
nu la naya tich xaa kwent cheen re xjwalt xaa.
33 Per nakiibt yalnkela cheen na lo xaa
nu nali gak na lo kwaan myaan na.
34 Nayenlazht na kwaan myaan na
nu tubka yo xtizh na lo xaa.
35 Tub welt myaan na lo yalnambeyy cheen na,
nakadet na David.
36 Nu lee dii cheen xaa tira nabeyy xlugar xaa,
lee pa zob xaa dii mod mbizh delant lo na.
37 Lee yalnabeyy cheen xaa tira ndii modxa tubka nzob mbee,
kwaan nzho tira naz leen yiba.
{Mbaz}
38 Per lee lu namkayaat rey,
xaa mleey lu
nu ngunayii lu ngune lu xaa.
39 Mluux lu kwaan myaan lu kwaan xaa nak xmos lu
nu mlebi lu xkoron xaa lo yizhyo.
40 Mlebi lu rese bla cheen yezh cheen xaa;
ngulo mluux lu yezh kwaan ngok yalngezh cheen xaa.
41 Rese xaa nded leen naz nzhe kwaan
nu rese xaa nzho gax yezh cheen xaa nxizhno xaa.
42 Mle non lu re xaa nayii ne xaa,
nel nal nkano xaa yalnabeyy.
43 Nu mle bset lu lo xspad xaa
nu namlet lu yud xaa lo dil.
44 Mluux lu baston cheen xaa
nu mlebi lu pa nzob xaa nabeyy lo yo.
45 Mkiib lu liin kwaan nzhaal ban xaa
nu mle lu zee mlu xkalnto xaa.
{Mbaz}
46 Xaa Tubka Nak,
¿Axta cho gor seetaka kaxlaan lu?
¿Che tubka nayii lu,
kwenta bal?
47 ¡Selazh lu na nel cheepse nak yalnaban cheen na!
Naxchet ban re myet.
48 ¿Cho xaa tira ban nu nanet yalgut?
¡Nyent cho nzho mod roo lo yalngezh cheen yalgut!
{Mbaz}
49 Xaa Nabeyy,
¿Pa nzha re yalnkela cheen lu kwaan yilo,
kwaan mcheroo lu lo David,
zee ngak nali lu lo xaa?
50 Xaa Nabeyy,
selazh xomod nxizhno xaa xmos lu
nu nii nawent xaa re nu,
xaa nak yezh cheen lu.
51 Xaa Tubka Nak,
lee re xaa nayii ne lu nii nawent nu,
kad gorna nze xaa mleey lu,
zee nii nawent re xaa xaa.
52 ¡Tubka wen doo nak Xaa Tubka Nak!
¡Sbaa gaka nu sbaa gaka!