Naab na lo lu zee nalaat lu yet na
Salm kwaan mkee re xtii Coré nu mzaa xaaya lo xaa nabeyy lo re xaa nzholl,
gorna nales nzholl xaa. Maskila cheen Hemán xgann Zera.
88
Dios,
Xaa Tubka Nak,
xaa nak yalnaban cheen na,
zhe nu yaal kwezh na lu.
2 ¡Zhin xtizh na lo lu,
kenzha xtizh na kwaan nii na lo lu!
3 Zyen doo kwaan nawent kayak lo na
nu merla la na leen baa,
pa nzho re xaa ngut.
4 Kwent nak na lo re xaa nya leen baa,
nak na mod tub xaa nyentra jwers,
5 mlaa re xaa na zee yet na
nu nak na mod re xaa nzho leen baa,
kwenta re xaa myenlazh lu
nu nak na kwenta re xaa mlaa lu.
6 Mcheep lu na leen yeer pa mas nech,
lo yalnakaw pa mas nech.
7 Mxaal lu yalnayii cheen lu lo na
¡nu naka kwenta nistoo,
kwaan msaaw na!
{Mbaz}
8 Lu mkiib re xaa myenn na lo na;
nu ne nawentra xaa na;
nzhibyoo na nu nyentra mod roo na.
9 Ngok ne garlo na nel tant mbinn na.
Xaa Tubka Nak,
yizata mbizh mbezh na lu;
nlep na yaa na lo lu.
10 ¡Nyent mod luu yalgro cheen lu lo re xaa ngut!
¡Nyent mod yixche re xaa ngut nu gool xaa lo lu!
{Mbaz}
11 ¡Nyent mod wdizh xaa yalnkela cheen lu
nu wdizh xaa kwaan wli cheen lu lo re xaa ngut!
12 ¡Nyent mod labeyy xaa re xcheen lu kwaan gro
nu re kwaan wli lo yizhyo pa nzho re xaa ngut!
13 Per lee na,
Xaa Tubka Nak,
naab na lo lu zee le lu yud na;
lee garziil nkwaan na lu nu nii na lo lu.
14 Xaa Tubka Nak,
¿Chozhiin ntexonn lu na?
¿Nu chozhiin nkaxlaan lu lo na?
15 Axta leezha mad na kadeed na bid nu mer doo nget na,
mzheb doo na ne na lu,
nu yanayetra na.
16 Mded yalnayii cheen lu lo na,
nu mer nglux na lo yalnacheb.
17 Dubse zhe lee yalnacheb nzho dub welt lo na,
mod nis;
nu tira mbiiya lo na.
18 Mkiib lu re xaa nkela na,
lee nal nzo na lo yalnakaw.