Tubka ngunaab xaa zee kela Dios xaa
Kwaan ngunii David.
86
Xaa Tubka Nak,
kenzha kwaan nii na lo lu,
nel prob na nu nales nzhak na.
2 Kanap na nel nali nak na lo lu,
¡lu nak Xtios na,
le yud na,
xaa nak xmos lu,
nel lo lu ngwii na!
3 Xaa Tubka Nak,
bkano yalnles lo na,
nel dubse zhe nii na lo lu.
4 Ble nix lextoo na,
xaa nak xmos lu,
nel lo lu,
Xaa Nabeyy,
nzhaal nii na.
5 Lu,
Xaa Nabeyy,
wen doo nak lu nu nche lu jwalt,
gro doo nak yalnkela cheen lu lo re xaa mbezh lu.
6 Xaa Tubka Nak,
kenzha kwaan nii na lo lu,
bin kwaan nii na lo lu.
7 Mbizh kwaan nales doo gak na zee kwezh na lu
nu lee lu keb lo na.
8 Xaa Nabeyy,
nyentra stub dios mod lu,
nyentra stub xaa nle kwaan mod lu.
9 Xaa Nabeyy,
rese yezh kwaan mlek lu lo yizhyo,
yiid gool delant lo lu,
nu zeet xaa le lu.
10 Nel gro doo nak lu nu nle lu zyen doo kwaan gro.
¡Nebse lu nak Dios!
11 Xaa Tubka Nak,
lu xnaz lu lo na,
zee zee na lo kwaan wli cheen lu;
le nali lextoo na,
zee zheb na ne na lu.
12 Dios,
Xaa Nabeyy lo na,
gol na lo lu kwaan dub lextoo na,
nu tubka zeet na le lu.
13 Gro doo nak yalnkela cheen lu lo na,
nu mloo lu na leen baa cheen yalgut.
14 Dios,
re xaa nto yalxwa nsaaw na;
zyen doo xaa nzhekla gut na,
nak xaa xaa kwaan nangwiit lo lu.
15 Per lee lu,
Xaa Nabeyy,
nak Dios,
xaa nlesla nu xaa wen nak,
nen doo nayii lu nu gro doo nak yalnkela cheen lu nu nali nak lu.
16 Wii lo na nu kano yalnkela lo na;
zaa yalngezh lo na,
xaa nak xmos lu
nu kanap lu na,
xaa nke zhiin lo lu.
17 Ble tub nseyn lo na,
zee wii re xaa kwaan nii nawent lo na nu ton xaa,
nel lu,
Xaa Tubka Nak,
mle yud na nu mseleyy na.