Naab xaa lo Dios zee gak wen Israel
Salm kwaan mkee re xtii Coré nu mzaa xaaya lo xaa nabeyy lo re xaa nzholl.
85
Xaa Tubka Nak,
wen doo ngok lu lo yezh cheen lu
nu wen mle lu Kob stuba.
2 Mche lu jwalt cheen lazh lu,
rese jwalt cheen xaa mkiib lu.
{Mbaz}
3 Mlaa lu xyan cheen lu
nu nanayiitra lu ne lu xaa.
4 Dios,
ble wen nu stuba,
nel lu nak xaa nzaa yalnaban;
bluux yalnayii cheen lu lo nu.
5 ¿Che tubka nzhaal xyan lu ne lu nu?
¿Che tira kano lu yalnayii lo tub dii nu lo stub dii?
6 ¿Che nabaret lu zaa lu diizh ban nu stuba,
zee gak nix lextoo yezh cheen lu?
7 Xaa Tubka Nak,
blu yalnkela cheen lu lo nu
nu ble yud nu.
8 Kenzha na kwaan né Dios,
Xaa Tubka Nak,
nel lee xaa nii wen,
zee kwi wen yezh cheen xaa,
xaa nali nak,
zee naletra xaa kwaan nachan.
9 Wlipa gax doo nzo Dios lo re xaa nzheb ne xaa,
zee le xaa yud xaa,
zee yo yalnix cheen xaa lo xkizhyo be.
10 Nguzhal yalnkela nu kwaan wli
nu lee kwaan nali nu kwaan wen mzhaal.
11 Lee kwaan wli xen lo yizhyo,
nu naz yiba roo kwaan nali.
12 Xaa Tubka Nak,
xaal doo yey,
nu lee xkizhyo be zaa doo xle.
13 Lee kwaan nali yaner lo xaa
nu xal naz ze xaa.