Nix nzhak lextoo na zo na garli lu
Salm kwaan mkee re xtii Coré nu mzaa xaaya lo xaa nabeyy lo re xaa nzholl. Kwaan nzhaal gool xaa lo tub kwaan le gitit.
84
¡Xaa Tubka Nak,
Xaa Nkano Dubse Yalnabeyy,
aka chul nak garli lu!
2 ¡Aka nix nzhak lextoo na zo na garli lu,
Nzhekla na zo na garli Xaa Tubka Nak!
¡Kwaan dub lextoo na
nu kwaan dub yek na gol na lo Dios,
xaa mban!
3 Xaa Tubka Nak,
Xaa Nkano Dubse Yalnabeyy,
rey cheen na nu Xtios na,
axta re myaa ndexkwaa xlaaz paro kwek ma ngo
nu axta re korluunch nkano xlaaz gax lo mdo cheen lu.
4 ¡Wen re xaa nzho garli lu,
xaa tubka nzholl lo lu!
{Mbaz}
5 Wen re xaa nkano yalngezh cheen lu,
xaa nze lo xnaz lu.
6 Gorna ded xaa lo lach kwaan le Nzhonn Xaa,
zee gaka tub pa nzhiib nis,
lee gorna nla yey zee nxen re kwaan lo lach.
7 Lee gorna yixoob xaa yi Jerusalén zee masra kano xaa jwers,
zee ne xaa lo Dios.
8 Dios,
Xaa Tubka Nak,
Xaa Nkano Dubse Yalnabeyy,
kenzha kwaan nii na lo lu;
¡Dios cheen Kob,
kenzha xtizh na!
{Mbaz}
9 Wii Dios,
lu nak mod tub lee yiib kwaan nsaaw nu
nu wii lo xaa mleey lu gak rey.
10 Nonra zo na tub mbizh garli lu,
ke zo na tub mil mbizh stub pa.
¡Wenra kweey na zo na kanap na roo pwert garli Dios
ke zo na lo re xaa nawent nak!
11 Lee Xaa Tubka Nak,
nak xni nu nak mod tub lee yiib nsaaw re xaa;
Dios nzaa yalnix nu yalnkela,
nankiibt xaa kwaan wen,
lo re xaa nali nak.
12 Xaa Tubka Nak,
Xaa Nkano Dubse Yalnabeyy,
¡wen rese xaa kwaan ngwii lo lu!