Yalwen cheen Dios nu yalnakap cheen Israel
Salm kwaan mkee Asaf nu mzaa xaaya lo xaa nabeyy lo re xaa nzholl. Kwaan nzhaal gool xaa lo tub kwaan le gitit.
81
Kwaan yalnix bill gu lo Dios,
xaa nak yalngezh cheen be,
¡Kwaan yalnix bill gu lo Dios cheen Kob!
2 Bill gu kant kwaan tambor chuut,
kwaan bagwel kwaan nkano chii yib nu kwaan bagwel kwaan nkano chiibchop yib.
3 Kwezh gu trompet gorna ke mbee yeen
nu gorna ngol mbee,
mbizh kwaan nak yalni cheen be.
4 Nel kwaane nak ley lo re be,
xaa Israel,
ley kwaan mxaal Dios cheen Kob,
5 Nak ley kwaan mzaa xaa lo xtii Che,
gorna mchazi Dios re xaa Egipto.
Mbin na tub diizh kwaan namlat yek na:
6 “Mkiib na kwaan nke tich lu,
mle na zee nadedt lu bid wee lu chekwid.
7 Mrezh lu na gorna nales ngok lu nu lee na mle yud lua;
mkeb na lo lu axta gorna ngoch ngwzi leen xkaw;
nu mle na preb lu naz Meribab pa nzho nis.
{Mbaz}
8 Yezh cheen na,
kenzha kwaan nzhaal nii na lo lu.
¡Chol ngon lu xtizh na,
xaa Israel!
9 Nakanot lu stub dios,
Nixa nakichxubt lu lo stub naz dios.
10 Nebse na,
xaa nak Xtios lu,
Xaa Tubka Nak,
nel mlo na lu yizhyo Egipto,
kwaanzee xal roo lu,
zee za na kwaan gaw lu nu yizhe lextoo lu.
11 Per lee yezh cheen na nambint xtizh na,
Israel namlet kas na.
12 Kwaanzee mla na xaa lo xgab cheen xaa
nu mle xaa kwaan nyula xaa.
13 ¡Chol ngon yezh cheen na xtizh na!
¡Chol ngze Israel xnaz na!
14 Zeesi tub rataka ngluux na re xaa nayii ne lu
nu tira ngtezi na re xaa.
15 Rese xaa nayii ne Xaa Tubka Nak zheb doo
nu tubka ded xaa bid.
16 Per lee lo lu za na nzhobxtil kwaan wenra,
nu mzhin kwaan nzho leen ke,
zee le na yizhe lextoo lu.”