Ble wen lo nu
Salm kwaan mkee Asaf nu mzaa xaaya lo xaa nabeyy lo re xaa nzholl. Naka kwaan nzhaal gool xaa lo kant cheen “yeey kartuch”.
80
Xaa nkanap Israel,
¡kenzha!
Lu xaa nkanap re xtii Che mod mbakxiil.
Lu,
xaa nzob nabeyy xsaw lo re mandad kwaan le kerubin,
lu xni cheen lu.
2 ¡Blu yalnabeyy cheen lu lo Efraín,
lo Benjamín nu lo Manasés!
¡Te le yud nu!
3 Dios,
le wen nu;
bwii wen lo nu,
nu le yud nu.
4 Dios,
Xaa Tubka Nak,
Xaa Nkano Dubse Yalnabeyy,
¿Axta cho gor luu lu nayii lu ne lu kwaan nii yezh cheen lu lo lu?
5 Re kwaan nzhonn nu mzaa lu ndaw nu
nu re kwaan nzhonn nu mzaa lu ngu nu.
6 Mle lu re yezh nzho gax nii nawent nu
nu re xaa nayii ne nu nxizhno xaa nu.
7 Dios,
Xaa Nkano Dubse Yalnabeyy,
ble wen lo nu,
bwii wen lo nu,
nu le yud nu.
8 Mle lu zee mroo tub xan yag ub yizhyo Egipto;
mloo lu yezh nu mxeen luya.
9 Mle nzhul lu yizhyo,
nu mxen loxa zee nguzheya dubse yizhyo.
10 Msaawa yek re yi
nu noka mzaaya xkal lo re yag sedr kwaan nak cheen Dios.
11 Re ram cheena mzhin axta roo nistoo
nu re ben cheena mzhin axta roo yuu Éufrates.
12 ¿Chozhiin mluux lu yilo cheena,
zee rese xaa nded naz ba nla ub?
13 Re kuch wen nluuxa,
re ma wen,
ma nakap,
kayawa.
14 Dios Xaa Nkano Dubse Yalnabeyy bare lo nu,
axta yiba wii lo nu.
Te nu ble yud nu,
xaa nak yag ub cheen lu,
15 Yag ub kwaan mzo lu kwaan yalnabeyy cheen lu,
nu ben kwaan leeka lu mle mxen.
16 Mchoog xaaya nu mzek xaaya lo yalnayii cheen xaa,
kwaanzee naab na zee luux lu re xaa ba.
17 Per ble yud xaa mleyy lu,
xaa mzaa lu yalnabeyy lo.
18 Snee nabachitra nu lo lu;
zaa diizh ban nu zee gool nu lo lu.
19 Dios,
Xaa Tubka Nak,
Xaa Nkano Dubse Yalnabeyy,
ble wen lo nu,
bwii wen lo nu,
nu le yud nu.