Nanlaat Dios be
Salm kwaan mkee Asaf.
79
Dios,
mbiid re yezh kwaan nzhekla zen yizhyo ne,
kwaan nak kwaan mzaa lu lo nu
nu mle beed xaa leen yidoo cheen lu pa nambey
nu lee Jerusalén tira mluux xaa.
2 Nu mzaa xaa xkwerp re xmos lu,
ngok kwaan ndaw re myin,
ma nzebi naz yiba;
nu lee kwerp cheen re xaa lu,
xaa nali,
gak kwaan gaw re ma nakap.
3 Dubse Jerusalén mxo xren xaa,
modxa nxo xaa nis
nu nyent cho kaach re xaa ngut.
4 Re yezh nzhi gax,
nxizhno xaa be
nu nebse be nawent nzhedizh xaa.
5 Xaa Tubka Nak,
¿axta cho gor laa lu nayiitra lu?
¿Che tubka yii lu kwenta bal?
6 Bxaal yalnayii cheen lu lo re yezh kwaan nanlabeyyt lu
nu lo re xaa kwaan nanzheklat wii lo lu,
7 nel mluux xaa Kob
nu leen yezh ngulo mlux rese yoo.
8 Byenlazh re kwaan nawent kwaan mle re xey nu mbizh yilo.
¡Kwaan yalnles cheen lu,
le prad te lo nu,
nel nales doo nzhak nu!
9 Dios,
zaa yalnaban lo nu,
nu le yud nu kwaan xni cheen lu,
bloo nu nu che xjwalt nu,
nu le yud nu zee lee re myet nii wen le lu.
10 Nanont yé re xaa nanakt xaa Israel:
“¿Pa nzob Xtios xaa?”
Nzhekla na zee wii re xaa yizhyo,
noka wii nu,
xomod naab lu kwent cheen ren cheen xaa nak xmos lu.
11 Bkayaa re kwaan nii re xaa nzho lozhyib,
le yud re xaa nakladiizh yet
kwaan yalnabeyy cheen lu.
12 Xaa Tubka Nak naab na,
zee tezi lu gazh welt rese yezh nzhi gax,
re mod mxizhno xaa lu.
13 Nu nak yezh cheen lu
nu mbakxiil,
ma nkanap lu pa nzho yixyi naye;
tubka zaa nu dixkix lo lu,
tubka gool nu kant lo lu,
tub dii nu stub dii.